Erlan Saırov: Prezıdenttiń bastamalary Qazaqstan jastaryn biriktire túsedi

ASTANA. QazAqparat - Memleket basshysy Nursultan Nazarbaevtyń Jastar jylynda kótergen bastamalary elimizdiń jastaryn biriktire túseri anyq. Belgili saıasattanýshy Erlan Saırov osyndaı pikir bildirdi, dep habarlaıdy QazAqparat tilshisi.

«Endigi kezekte, stýdentter, jas ǵalymdar men mamandar - saıasattyń negizgi ózegi dep aıtýǵa bolady. Bizdiń osy salaǵa mán berýimizdi durys qadam dep aıtar edim. Tyń bastamalar boıynsha jastarǵa páter berilip, bıznes pen ǵylymı jobalardy damytý úshin qarajat bólinetin bolady. Mundaı qoldaý jastarǵa senimdilik bere túseri aıqyn. Prezıdenttiń bul bastamalary jastardy biriktire otyryp, jastardyń táýelsiz ári aqyldy shoǵyryn qalyptastyrady. Biz búgin jastarǵa kómek qolyn soza otyryp, memleketimizdiń irgetasyn bekemdep jatyrmyz», - deıdi Erlan Saırov.

Eske sala ketsek, Prezıdenttiń qatysýymen Qazaqstanda Jastar jyly resmı túrde bastalǵan bolatyn. Memleket basshysy Astanada uıymdastyrylǵan «Táýelsizdik urpaqtary» atty saltanatty sharada jas mamandar men otbasylardy qoldaýǵa qatysty birqatar tapsyrmalardy júktegen edi.

«Halqy mıllıonnan asqan shaharlar kóbirek bolǵanyn qalaımyn, sebebi osyndaı qalalarda bilim berý, ǵylym men mádenıettiń damý qarqyny joǵary bolady. Sarapshylardyń aıtýynsha, álemniń 600 iri qalasy álemdik ónimniń 60 paıyzyn óndirý kórsetkishine jetedi. Bizde iri shahar retinde Almaty ǵana bolǵan edi, endi Astana men Shymkent te osy deńgeıge jetti. Taǵy da eki qala osyndaı mejege jetý aldynda tur. Osy iri qalalarda jylyna 1 myńnan kem emes páter jumys isteıtin jastar úshin salatyn bolamyz», - degen edi Nursultan Nazarbaev Úkimetke bergen tapsyrmasynda.