Erlan Saırov: Prezıdent usynǵan saıası reformalarǵa halyq oń baǵa berip otyr
Baıandamanyń tanystyrylýyna Ulttyq qoǵamdyq seniń keńesiniń músheleri Talǵat Qalıev, Azamathan Ámirtaı, Murat Ábenov, sonymen qatar QSZI ókilderi Madına Nurǵalıeva, Alýa Joldybalına qatysýda.
«Bizdiń elimizde, qoǵamda demokratııaǵa degen suranys arta tústi. Ózderińiz biletindeı, keıingi eki jyldyń ishinde pikirler plıýralızmi men kózqarastardyń ár alýandyǵynda úlken ózgeris bar. Osy serpiliske jaýap retinde ótken jyldyń qyrkúıeginde Ulttyq qoǵamdyq senim keńesi qurylǵan bolatyn. Ulttyq keńes jarty jyldyń ishinde qandaı jumys atqardy? Onyń jumysy qoǵamǵa qandaı serpin berdi? Sonymen qatar halyqaralyq dárejede Qazaqstandaǵy demokratııa máselesi nemese erkindik, bostandyq ındeksine qandaı jaqsy áser bergeni jóninde biraz saraptama jumystary kerek», - dedi Erlan Saırov.
Onyń aıtýynsha jarty jyldyń ishinde Ulttyq keńes qoǵamdy eleń etkizgen jumystardy júrgizgen.
«Halyqaralyq dárejede EYUQ men BUU, AQSh-tyń Memlekettik departamenti Ulttyq keńestiń qurylýyna oń baǵasyn berdi. Sonymen birge jeltoqsandaǵy ekinshi otyrysta elimizdi demokratııalandyrýdyń birinshi paketi usynylǵan bolatyn. Mine, osy máseleniń bári qoǵam ishinde qalaı talqylanyp jatyr? Qoǵam qalaı qabyldaýda? Osy suraqtarǵa jaýap berý kerek. Jaýap bererde saıasattaný turǵysynan belgili bir zertteýler júrgizildi. Bizdiń búgingi qujat – áleýmettik jáne saıası zertteýlerdiń nátıjesi», - dedi ol.
Erlan Saırov búgingi otyrysta joǵaryda ınstıtýt jáne qoǵam sarapshylary atalǵan máselelerdiń aspektilerin talqylaıtynyn jetkizdi.
«Ulttyq keńes bizdiń elimizdegi demokratııany, azamattardyń bostandyq ındeksin joǵarylatýǵa óziniń úlesin qosyp otyr. Sarapshylar osylaı deıdi. Árıne bizdiń qoǵamda Ulttyq keńeske qatysty ártúrli kózqaras bar. Bireýler bul keńestiń jumysyna syn kózben qaraıdy. Pikir alýandyǵy bolǵandyqtan bul zańdy nárse. Biraq sarapshylardyń paıymdaýynsha, Ulttyq keńes - búgingi tańda elimizdiń ishinde halyqtyń ózin-ózi basqarýy, azamattardyń erkindigi men bostandyǵy turǵysynda jasalǵan úlken naqty qadam. Qasym-Jomart Toqaevtyń usynǵan saıası reformalar paketi búgingi tańda halyq arasynda oń baǵaǵa ıe bolyp otyr», - dedi ol.
Aıan Bekenuly
