Erlan Saırov: Partııalar máslıhattaǵy resýrsyn paıdalana bermeıdi

NUR-SULTAN. QazAqparat – Saıasattanýshy Erlan Saırov jergilikti máslıhattarda partııalardyń ókilderi belsendi jumys isteýdiń mańyzdy tusy týraly aıtty, dep habarlaıdy QazAqparat tilshisi.

«2016 jyly Parlament saılaýy ótken kezde máslıhattar quramyna «Aq jol», «Aýyl» partııalarynyń ókilderi engen bolatyn. Al búgingi kúnge keler bolsaq, oblystyq jáne aýdandyq deńgeıdegi máslıhattarda partııalardyń qatysý kórsetkishi joǵary bolar degen oıdamyn. Bizdiń eldegi partııalar osy resýrstardy paıdalana bilýi kerek. Bir ókinishtisi, kóptegen partııa máslıhattardaǵy resýrsyn paıdalana bermeıdi», - dedi Erlan Saırov elordada ótken «SAILAU-2021: Parlament saılaýynyń aldyn ala qorytyndylary» atty saraptamalyq talqylaýda.

Onyń aıtýynsha kez kelgen partııa bolsyn, qoǵamdyq uıym bolsyn eldiń damýyna, táýelsizdigin nyǵaıtýǵa eńbek sińirýi kerek. Saıasattanýshynyń aıtýynsha, bul – basty mıssııa.

«Ekinshi mıssııa – halyqtyń ál-aýqatyn kóterý. Halyqtyń ál-aýqatyn kóterý isimen jergilikti atqarýshy máslıhattar quramynda da aınalysýǵa bolady. Qazaqstanda buǵan deıin qandaı problema bar edi. Eldegi basty problema – óńirlerde (aýdandyq bolsyn, oblystyq bolsyn) qoǵamdyq-saıası protses joq bolatyn. Osy protsesti qalyptastyryp, quryp, qalpyna keltirý kerek», - dedi ol.