Erlan Saırov óndiriste adam kóz jumǵan jaǵdaıda 10 jyldyq jalaqy kólemindegi tólem engizýdi usyndy
«Prezıdent Qasym-Jomart Toqaev jaqynda Ulttyq keńeste sóılegen sózinde eńbek qaýipsizdigi sharalaryn jetildirýge erekshe nazar aýdardy. Sonymen qatar, 2020 jyly respýblıka kásiporyndarynda jazataıym oqıǵalardyń nátıjesinde 1 503 adam zardap shekti, bul aldyńǵy jyldyń uqsas kezeńimen salystyrǵanda 5 paıyzǵa artyq (1430) jáne ólimmen aıaqtalǵan 208 jazataıym oqıǵa oryn aldy, bul aldyńǵy jyldyń uqsas kezeńine qaraǵanda 15 paıyzǵa artyq (180)», - dedi E. Saırov Úkimet basshysynyń orynbasary Eraly Toǵjanovtyń atyna joldaǵan saýalynda.
Kásipodaqtar federatsııasynyń málimetinshe, 192 kásiporynda adam ólimine ákep soqqan jazataıym oqıǵalar oryn alyp, 163 kásiporynda jumys berýshiniń kinási dáleldendi. Bul rette tek 58 kásiporynda kásipodaq uıymdary bar. Bul kórinis jumys berýshilerdiń qyzmetkerler úshin qaýipsiz eńbek jaǵdaılaryn qamtamasyz etý máselelerindegi jaýapsyzdyǵyn baıqatady.
«Ólimmen aıaqtalǵan óndiristik jaraqattanýdyń eń joǵary deńgeıi dástúrli túrde qurylys salasynda (19 %), taý-ken metallýrgııa salasynda (14 %), aýyl sharýashylyǵynda (8%) baıqalady», - dedi depýtat.
Osy oraıla ol Úkimet pen bıznes eńbekti qorǵaý men onyń qaýipsizdigine, eldiń eńbek resýrstarynyń sapasyn arttyrýǵa jiti nazar aýdarýy tıis ekenin aıtty.
Bul turǵyda depýtattyq saýalda jaǵdaıdy túzetý úshin tıisti usynystar aıtyldy:
1. Óndiriste adam qaza tapqan jaǵdaıda jumys berýshi onyń otbasyna 10 jyldyq jalaqynyń kóleminde bir rettik tólem jónindegi talapty qalypqa keltirý. Búginde kásiporyndarda eńbek qaýipsizdigin arttyrýǵa eshqandaı ekonomıkalyq yntalandyrý joq. Sondyqtan osy salada, adamdardyń ólimine alyp keletin, kózboıaýshylyq pen formalızm qaptap ketken.
2. Eńbekti qorǵaý jónindegi tehnıkalyq ınspektorlardyń nusqamalaryn oryndamaǵany úshin jaýapkershilik sharalaryn aıqyndaı otyryp, olardyń mártebesin quqyqtyq deńgeıge shyǵarý qajet. Tıisinshe, eńbek salasyndaǵy qoǵamdyq baqylaýdyń róli men tehnıkalyq ınspektorlardyń mıssııasyn arttyrý kerek.
3. Áleýmettik áriptester eldiń kásipodaqtarymen birlesip, tehnıkalyq ınspektorlardyń ókilettikterin arttyrý maqsatynda salalyq kelisimderge jáne ujymdyq sharttarǵa eńbekti qorǵaý jónindegi tehnıkalyq ınspektorlardyń ózektendirilgen ókilettikteri men materıaldyq yntalandyrý qadamdaryn engizgen durys.
4. Óndiristegi jazataıym oqıǵalar men kásibı aýrýlardy esepke alý men baqylaýdyń biryńǵaı aqparattyq júıesi qalyptastyrý mańyzdy.
5. Óndiristegi jazataıym oqıǵalardan, kásiptik aýrýlardan zardap shekkenderdi jáne kásiptik táýekeli joǵary qyzmetkerlerdi jumysqa ornalastyrý úshin qoldanylatyn mamandyqtar Atlasyn ázirleý mańyzdy.
