Erlan Saırov: Muǵalim eńbekaqysyn kóterý sheshimi - Joldaýdyń mańyzdy aspektisi
«Prezıdenttiń Joldaýy optımıstik mánge ıe bolyp otyr. Qazaqstan álemdik ekonomıkalyq keńistiktiń bóligi bolǵandyqtan, biz únemi álemdik áleýmettik-ekonomıkalyq úrdisterdi saralap, onyń farvaterinde bolýymyz kerek. Álemde jappaı tsıfrlandyrý protsesi júrip jatyr. Osy oraıda Qazaqstan bul iri ózgeristerge saqadaı saı turýy tıis. Bul rette Prezıdenttiń Joldaýy kóptegen máselelerdi qamtyp otyr», - dep toqtaldy E. Saırov.
Saıasattanýshynyń sózine qaraǵanda, qazirgi kezde dúnıejúzinde áleýmettik-eńbek qatynastarynda eleýli ózgerister oryn alýda. Elimiz ozyq ózgeristerden qalyp qoımaýy úshin Tórtinshi ónerkásiptik revolıýtsııanyń qamtyp otyrǵan qadamdary óte mańyzdy bolyp otyr.
«Memleket tsıfrlandyrý protsesterine aıryqsha mán berip otyrǵany málim. Eger de búginde tsıfrlyq tehnologııalardy ıelenbesek, onda biz tarıhı damýdan shetkeri qalatynymyz túsinikti», - dep naqtylady ol.
Budan bólek E. Saırov Prezıdent Joldaýynda adamı kapıtaldy damytýǵa erekshe ekpin qoıylyp otyrǵanyn, sondaı-aq bul eń qajetti qadamnyń biri ekenin alǵa tartty.
«Adamı kapıtal memlekettik ekonomıkalyq ósimi men áleýmettik damýynyń basty talaby men irgetasy», - deıdi saıasattanýshy.
Sonymen qatar ol muǵalimderdiń eleýli eńbegine laıyqty baǵa berilip otyrǵandyǵyn sóz etti.
«Joldaýda muǵalimderdiń eńbekaqysyn joǵarylatý týraly aıtylǵan. Meniń oıymsha, bul baǵyttaǵy sheshim Memleket basshysy Joldaýynyń mańyzdy aspektileriniń biri. Muǵalimder men oqytýshylardyń ómir súrý deńgeıine, moraldyq jaǵdaıyna kóp másele tyǵyz baılanysty. Olardyń eleýli eńbegine laıyqty baǵa berile bastady. Endi olardyń qoǵamdyq mártebesi turǵysyndaǵy jumysqa qyzý kirisý kerek. Bul rette azamattyq qoǵam men memlekettik birlesken is-qımylyna ekpin qoıǵan jón», - dep túıindedi sózin Erlan Saırov.
Aıta keteıik, búgin jarııalanǵan QR Prezıdenti Nursultan Nazarbaevtyń Qazaqstan halqyna Joldaýynda ustazdar jalaqysyn arttyrý qadamdary eskerilgen.
«Muǵalim mártebesin arttyrý maqsatymen bilim berýdiń jańartylǵan mazmunyna kóshken ustazdardyń laýazymdyq jalaqysyn 2018 jyldyń 1 qańtarynan bastap 30 protsentke kóbeıtýdi tapsyramyn. Jańartylǵan mazmun degenimiz - halyqaralyq standarttarǵa saı keletin jáne Nazarbaev zııatkerlik mektepterinde beıimdelýden ótken zamanaýı oqý baǵdarlamalary. Bular bizdiń balalarymyzǵa qajetti fýnktsıonaldyq saýattylyq pen synı turǵydan oılaý qabiletin darytady», - delingen Joldaýda.
