Erlan Saırov: Qoǵamda muǵalimderdiń róli arta bereri anyq

NUR-SULTAN. QazAqparat – Qazaqstan áleýmettik qarym-qatynas pen ekonomıkanyń jańasha ári sapaly deńgeıine jyljyp keledi. Bul rette qoǵamda muǵalimder men pedagogıkanyń róli men salmaǵy arta bereri aıqyn. Saıasattanýshy, Ulttyq qoǵamdyq senim keńesiniń múshesi Erlan Saırov Ustazdar kúni qarsańynda osyndaı pikir bildirdi, dep habarlaıdy QazAqparat tilshisi.

«Álem tehnologııalyq sıpaty ózgerip barady. Áleýmettik qarym-qatynas pen ekonomıkanyń jańasha ári sapaly deńgeıine jyljyp kelemiz. Árıne, bul rette muǵalimder men pedagogıkanyń róli men salmaǵy arta bereri aıqyn. Aldaǵy kezeńde tulǵany tárbıeleý men oqytýdyń ortalyq fıgýrasy – ustaz bolyp qalary haq. Sol sebepti, pedagogıka men muǵalimderge qazirgi ýaqytta memlekettik deńgeıde zor mańyz berilýde. Búgingi kúni pedagogıka salasynda jetistikterimen birge problemalary da baryn bilip otyrmyz. Prezıdent Qasym-Jomart Toqaevtyń Qazaqstan halqyna Joldaýynda pedagogıkanyń jańa róliniń negizgi tetikteri aıqyndalǵan», - dedi sarapshy Ustazdar kúnine arnalǵan «Prezıdent Qasym-Jomart Toqaevtyń Qazaqstan halqyna Joldaýy: muǵalimniń áleýmettik rólin arttyrý aspekti» taqyrybynda ótken dóńgelek ústelde.

Erlan Saırovtyń aıtýynsha, salanyń damýy úshin memleket uıymdastyrýshylyq baǵytta jumysty jetildirip, qarjylandyrý mólsherin arttyryp keledi.

«Bárimiz biletindeı, kelesi jyldan bastap muǵalimderdiń aılyǵy 25 paıyzǵa kóbeıedi. Osylaısha, 4 jyl boıy ustazdardyń tabysy eki esege ósedi. Synyp jetekshiligi úshin beriletin eńbekaqy eki esege artady. Demalys kúnderi uzarady. Bul qadamdar ustazdarymyzdy qanattandyrady degen senimdemin», - dedi ol.

Eske sala ketsek, osydan biraz ýaqyt buryn Úkimet otyrysynda «Pedagog mártebesi týraly» zań jobasy bekitilgen bolatyn.