Erlan Saırov: Qazaqstan jańa saıası dáýirge enip kele jatyr
«Bizdiń elimizdegi saıası transformatsııa jáne áleýmettik modernızatsııa máselesi is júzine asyp jatyr. Saıası máselelerge keletin bolsaq, partııa týraly zańǵa ózgerister engiziledi. Jańa sıpattaǵy mıtıng týraly zań qabyldanady. Sonymen birge, Parlament týraly zańǵa parlamenttik oppozıtsııa jónindegi jańa norma engiziledi. Bul máseleniń barlyǵy bizdiń elimizdegi adam ındeksiniń damýynyń, sonymen birge adamdardyń bostandyǵynyń artýyna alyp keletin naqty qadamdar», - dedi saıasattanýshy QazAqparat tilshisine.
Saıaattanýshynyń aıtýynsha, búgingi naqty qadamdar – Qazaqstandaǵy qoǵam men memlekettiń, halyq pen bıliktiń arasyndaǵy qarym-qatynastyń jańa turpatqa, adamgershilikti syılaý, adamnyń erkindigin, bostandyǵyn syılaý turpatyna engendigin kórsetedi.
«Bul – búgingi tańdaǵy Qazaqstannyń jańa saıası dáýirge kirip kele jatqanynyń naqty belgisi», - dedi ol.
Eske sala ketsek, búgin elordada Prezıdenti Qasym-Jomart Toqaevtyń qatysýymen Ulttyq qoǵamdyq senim keńesiniń ekinshi otyrysy ótti. Otyrysta Memleket basshysy Qazaqstanǵa «parlamenttik oppozıtsııa ınstıtýty qajet» ekenin aıtyp ótti.
