Erlan Saırov: Halyq Bank, Freedom, «Qazposhta» Astana qarjy ortalyǵyn salyqtan jaltarýǵa paıdalanyp otyr

ASTANA. KAZINFORM –Májilis depýtaty Erlan Saırov palata otyrysynan keıin Astana halyqaralyq qarjy ortalyǵy offshor quralyna aınalǵany týraly málimdemesiniń mánin túsindirdi.

— Astana halyqaralyq qarjy ortalyǵy negizinde sheteldik ınvestorlardy tartý úshin qurylǵan. Biraq Qazaqstannyń iri kompanııalary Qazaqstannyń salyǵynan jaltarý úshin sol AHQO-ǵa baryp tirkeledi. Qazaqstandyq kompanııa bolyp esepteletin 70-ten astam jer qoınaýyn ıgerýshi kompanııa, Halyq Bank, Freedom Bank sııaqty iri bankter, «Qazposhtanyń» ózi osy ortalyqqa tirkelgen Olardyń bári sol salyqtan jaltaryp otyr, — dedi ol. 

Depýtattyń aıtýynsha, bul quıtyrqylyqtar bıýdjetke keri áser etip otyrǵan kórinedi.

— Qazir ol eseptelip jatyr, júzdegen mlrd teńge. Ásirese jer qoınaýyn ıgerýshilerdiń sonda baryp tirkelýi respýblıka bıýdjetine tikeleı áser etedi. Sondyqtan qazaqstandyq iri kompanııalardyń, bankter men jer qoınaýyn ıgerýshilerdiń Astana halyqaralyq qarjy ortalyǵyna tirkelýine shekteý qoıýdy usynamyz, — dedi Erlan Saırov.

Aıta keteıik, búgin Májilistiń jalpy otyrysynda QQS salynatyn aınalymnyń tómengi shegi 40 mln teńge bolýy múmkin ekeni belgili boldy.