Erlan Saırov: Gaz baǵasynyń alypsatarlyqpen kóterilýine jol bermeý sharalary júzege asyrylady

NUR-SULTAN. QazAqparat - Baǵa dálizderin belgileý arqyly baǵanyń uzaq merzimdi turaqtylyǵyn qamtamasyz etý jáne gaz baǵasynyń alypsatarlyq kóterilýine jol bermeýdiń júıeli sharalary júzege asyrylady. Bul týraly Májilis depýtaty Erlan Saırov Facebook-tegi paraqshasynda jazdy, dep habarlaıdy QazAqparat.

«QR Premer-Mınıstri A. Mamınniń ókimimen Mańǵystaý oblysyndaǵy áleýmettik-ekonomıkalyq jaǵdaıdy qarastyrý úshin Úkimettik komıssııa quryldy.

Memleket basshysynyń tapsyrmasyn oryndaý maqsatynda Úkimet suıytylǵan munaı gazynyń baǵasyn retteý boıynsha sharalar toptamasyn iske asyrady.

Básekelestikti qorǵaý jáne damytý agenttigi AJQS ıelerine qatysty baǵalyq sóz baılasý boıynsha tergeýdi bastady», - dedi Erlan Saırov.

Onyń aıtýynsha, Mańǵystaý oblysynyń AJQS ıeleri bıznestiń áleýmettik jaýapkershiligi aıasynda bastamashylyq tártippen gaz qunyn lıtrine 120 teńgeden 85-90 teńgege deıin tómendetý týraly sheshim qabyldady.

«Baǵa dálizderin belgileý arqyly baǵanyń uzaq merzimdi turaqtylyǵyn qamtamasyz etý jáne gaz baǵasynyń alypsatarlyq kóterilýine jol bermeýdiń júıeli sharalary júzege asyrylatyn bolady. Bizge dál búgin birlik, yntymaq, sabyr qajet. «Sabyr túbi sary altyn!», s abyr saqtaıyq, aǵaıyn!», - dedi depýtat.