Erlan Saırov eń tómengi aılyqtyń mólsherin kóterýdi usyndy

ASTANA. KAZINFORM – Májilis depýtaty Erlan Saırov Premer-mınıstrdiń orynbasary Tamara Dúısenovaǵa joldaǵan saýalynda eń tómengi aılyqty ınflıatsııaǵa saı ındeksteýdi usyndy.

- Úkimettiń jasap jatqan sharalaryna qaramastan halqymyzdyń ál-aýqaty artpaı tur. Ulttyq statıstıka bıýrosynyń málimetterine súıensek, jan basyna shaqqandaǵy kiris 112-myń teńge bolyp otyr. Onyń 98 myń teńgesi tek qana azyq-túlik, kıim-keshek, kommýnaldyq qyzmetti tóleýge ketedi. Mysaly, Ulttyq statıstıka bıýrosynyń derekteri boıynsha, kúrishtiń baǵasy 31,3-paıyzǵa, jumyrtqa 16,9-paıyzǵa, sary maı men sút ónimderiniń baǵasy 12 paıyzǵa ósken. Kartop pen irimshik ónimderiniń baǵasy bir jyldyń ishinde 35 paıyzǵa ósken. Turǵyn úı-kommýnaldyq sharýashylyqqa kelsek, kommýnaldyq qyzmetter ortasha alǵanda 25 paıyzǵa qymbattaǵan, - dedi Májilis depýtaty.

Onyń paıymdaýynsha, mundaı azamattardyń shyǵynyn arttyryp, kiristerin tómendete beredi.

- Elimizdegi eń tómengi jalaqy 85 myń teńgeden kóterilgen joq. Bul 1,8 mln adamnyń turmys deńgeıine qatysty. Eń tómengi jalaqyny kóterý – Úkimettiń basty mindeti, - dedi ol.

Erlan Saırov Úkimetke eń tómengi aılyqty ındeksteýdi usyndy.

- Jumyssyzdyqtan saqtandyrý somasyn arttyrý arqyly eń tómen jalaqy alatyn adamdardyń saqtandyrý júıesin jetildirý kerek. Ákimder óńirlik aýyl sharýashylyq ónimderin jergilikti naryqqa qajetti mólsherde jetkizilýin qamtamasyz etýi qajet. Aýyl sharýashylyq ónimderine beriletin memlekettik tólemderdi ýaqytyly ári qajetti somada tolyq tólenýin qamtamasyz etý mańyzdy, - dedi depýtat.

Eske salsaq, Ulttyq bank tóraǵasy Tımýr Súleımenov te byltyr kóktemde eldegi eń tómengi aılyq kúnkóriske jetpeıtinin moıyndaǵan edi.