Erlan Saırov elimizdegi eń negizgi áleýmettik problemalardy atady

NUR-SULTAN. QazAqparat - Eýrazııalyq ıntegratsııa ınstıtýtynyń dırektory Erlan Saırov qoǵamdyq-saıası protsesterdi eń ózekti máseleler boıynsha málimdeme jasady, dep habarlaıdy QazAqparat tilshisi.

«Nur Otan» partııasy jaqtastary lıgasynyń qurylýyna oraı ótken baspasóz máslıhatynda E.Saırov elimizde áleýmettik jáne ekonomıkalyq problemalardyń kóptigine toqtaldy.

«Eń bastysy – áleýmettik ádildiktiń joqtyǵy. Bizde memleket baı bolǵanymen, halqy kedeı kereǵar jaǵdaı oryn alyp otyr. Jumyssyzdyqqa qatysty da óte úlken problema bar. Elimizde 2,1 mln adam ózin-ózi jumyspen qamtysa, 400 myńnan astam adam resmı túrde jumyssyz sanalady. Eńbekke qabiletti halyqtyń 30 paıyzdan astamy elimizdegi resmı jáne áleýmettik eńbek protsesterinen tysqary qalyp otyr», - dedi ol.

Sonymen qatar ınstıtýt basshysy BUU standartyna sáıkes, Qazaqstan halqynyń 19 paıyzy kedeıshilikte ómir súrip jatqandyǵyn, al bul memleketke úlken aýyrtpalyq salatyndyǵyn basa aıtty.

«Aýyldarda da úlken problema bar. Aýyl sharýashylyǵy ónimderin ártaraptandyrý da problemaǵa aınalǵan. Bir ǵana mysal keltire keteıin, nebári 8 mln halqy bar Izraıl 6 mlrd dollardyń aýyl sharýashylyǵy ónimin eksportqa shyǵaryp otyr. Al ulan-ǵaıyr jeri, mol áleýeti bar Qazaqstan eksportqa 800 mln dollardyń ǵana ónimin shyǵarady», - dedi Erlan Saırov.

Sondyqtan ol «Nur Otan» partııasynyń aldyna saıası, áleýmettik-ekonomıkalyq, rýhanı máselelerdi qoıyp, olardy sheshýdi talap etetindikterin atap ótti.