Erlan Saırov: Bizge tarıh arqyly bolashaǵymyzǵa jol salý qajet

ASTANA. QazAqparat - Ózimizdiń tolaǵaı tarıhymyzdy túletý  - óte ózekti. Áleýmettanýshy ári saıasattanýshy, QR Kásipodaqtar federatsııasy tóraǵasynyń orynbasary Erlan Saırov Elbasynyń «Uly dalanyń jeti qyry» atty maqalasyna oraı osylaı pikir bildirdi, dep habarlaıdy QazAqparat tilshisi.

«Kóńilge qonymdy. Ózińniń tarıhyńmen maqtanyp qana qoımaı, sol tarıhtyń qyr-syrlaryn saraptap, ǵylymı negizde bolashaqqa baǵdar jasaý óte ózekti. Biz jahandaný zamanyna ózimizdiń tamyrymyzben, sol tamyrymyzdy tereńdete otyryp enýimiz ózekti. Osy turǵyda, ózimizdiń tolaǵaı tarıhymyzdy túletý kún tártibinde  jáne ózekti. Otarlaý kezeńinde, bizdi, qazaqtardy, tarıhy bolmaǵan, bolmysy, bet-álpeti joq, dalany kezip júrgen halyq retinde kórsetý áreketteri boldy. Biz sol júıeli áreketterdiń kesirinen ózimizdiń tarıhymyzdan aırylyp qaldyq, tarıhty esimizge alǵymyz kelmedi, "tarıhtan sharshaý" sındromyna iliktik... "Halyqty qurtqyń kelse, onyń tarıhyn qurtý kerek, tarıhyn bilmegen halyq tobyrǵa aınalady" degen aspekt bar. Biz osynaý "máńgúrttik" zamandy da basymyzdan ótkerdik... Jahandaný protsesteri ulttyń ótkeni men ótkergenin basqasha kózqaraspen saraptaı otyryp, bolashaqqa baǵdar jasaýdy talap etedi...», - dep jazdy E. Saırov óziniń Feısbýktegi paraqshasynda.

Bul turǵyda sarapshy Uly Dala keńistigindegi jobalardy el ıgiligine paıdalaný kerektigin atap ótti.

«Jahandaný árqashan bolǵan... Halyqtardyń Uly kóshi, Altyn Orda, Delı sultanaty Uly dalanyń stsenarıimen bolǵan jahandanýdyń jobalary...Osy tarıhı jobalardyń jetistikterin áli kúnge deıin batys ıelenip, paıdalanyp keledi... Atty qolǵa úıretý, úzeńgi, metallýrgııa, altyn óńdeý tehnologııalary bizdiń qasıetti jerde paıda bolǵan... Osy jaıt batys tarıhnamasynda jabýly qazan bolyp tur. Ǵylymı-tehnıkalyq progresstiń tarıhshysy Lınn Ýaıt "Úzeńgini jasaý adamzat tarıhynda ushaq, avtomobıldi jasaýmen teń revolıýtsııa jasady" deıdi... Bizge tarıh arqyly, ózimizdiń bolashaǵymyzǵa jol salý qajet...», - dedi Erlan Saırov.