Erlan Saırov: ákimder «Nur Otan» partııasy praımerıziniń ádil ótýine kedergi jasamaýy tıis

NUR-SULTAN. QazAqparat - Jergilikti ákimder «Nur Otan» partııasy praımerıziniń ádil ótýine qysym jasamaýy tıis. Bul týraly QR Prezıdenti janyndaǵy Ulttyq qoǵamdyq senim keńesiniń múshesi, saıasattanýshy Erlan Saırov jarııa etken «Nur Otan» partııasy jaqtastar lıgasynyń úndeýinde aıtylǵan, dep habarlaıdy QazAqparat tilshisi.

«Elimiz jol aıryǵynda tur. Biz demokratııaǵa, ádilettikke jáne teńdikke degen tereń suranys týyndaǵan zamanda ómir súrip jatyrmyz. Saıası reformalardyń áleýmettik, trasformatsııalardyń qajettiligi búgingi turmystyń basty aspektisi. Óıtkeni, eldi saqtap jáne jetistikterdi arttyrýdyń basqa balamasy joq. Sondyqtan eń birinshi jergilikti jerdegi ákimder jumys stılin ózgertýi kerek», - delingen Erlan Saırov Ortalyq kommýnıkatsııalar qyzmetindegi baspasóz máslıhaty barysynda jarııalaǵan úndeýde.

Onyń atap ótýinshe, kóptegen ákim áli de komandalyq basqarýshylyq ádistermen jumys isteıdi jáne qoǵamdyq pikirdi eskergisi kelmeıdi.

«Al búgingi tańda praımerız bul - jastar úshin múmkindikter terezesi. Sondyqtan biz osy ártúrli deńgeıdegi ákimderdi praımerızdi ádil jáne shynaıy ótýine úles qosýǵa jáne ákimshilik, ámirshilik eshqandaı qysym jasamaýǵa shaqyramyz. Eger ondaı qysym bolsa, onda «Nur Otan« partııasynyń jaqtastar lıgasy partııaǵa sondaı ákimderdi, sheneýnikterdi partııalyq turǵyda jazalaý ári partııadan shyǵarý týraly usynys engizetin bolady», - dedi saıasattanýshy.