Erlan Saırov: 82,9 mln gektar bosalqy jer tıimsiz ıgerilip jatyr

ASTANA. KAZINFORM — Májilis depýtaty Erlan Saırov Premer-mınıstr Oljas Bektenovke memleketke qaıtarylǵan jerdiń kóbi ıgerilmeı jatqanyn saýal etip joldady. 

— Memleket basshysy keshegi Joldaýynda atap ótkendeı, ákimdikter jańa jer paıdalanýshylarǵa qaıtarylǵan jerdiń jartysyna jetpeıtin bóligin ǵana qaıta úlestirgen. Bul nebári 6 mln gektar. Osylaısha qazirdiń ózinde qaıtarylǵan 7,5 mln gektar jer bos jatyr, 82,9 mln gektar bosalqy jer tıimsiz ıgerilip jatyr.
29 mln gektardan astam jer degradatsııa jaǵdaıynda, onyń ishinde 3 mln gektarǵa jýyǵy tuzdanyp ketken, — degen depýtat Qazaqstanda jerdiń kómirtekti eginshilikke jaramdylyǵy men degradatsııasy týraly derekterdi jınaqtaıtyn ortalyqtandyrylǵan aqparattyq júıe joq ekenin atap ótti.

Erlan Saırov Úkimetten kelesi egis naýqanyna deıin aýylda bos jatqan 7,5 mln gektar jerdi ashyq jáne ádil úılestirýdi talap etti.

— Jer resýrstarynyń tsıfrlyq kartasyn jáne Jaıylymdar kadastryn jedel iske qosý, sonyń ishinde muqtaj fermerler men qarapaıym aýyl turǵyndaryn jaıylymdarmen qamtamasyz etýge múmkindik beredi.

Naqty jer derekterin kadastrlyq málimettermen biriktirý qajet, — dedi Májilis depýtaty.

Eske salsaq, Prezıdent Qasym-Jomart Toqaev ta bıylǵy Joldaýynda aýyl sharýashylyǵy jerlerin berý tásilderin túbegeıli ózgertý kerektigin aıtqan bolatyn.