Erlan Saǵadıev synǵa qaldy: Qazaqstan bilim reıtınginde 77-orynǵa túsip ketken
«Jalpy, bizdiń eldiń bilimine jaqsy baǵa berilgenimen, bilim salasyndaǵy BEF JBQ reıtınginde (Búkilálemdik ekonomıkalyq forýmnyń jahandyq básekege qabilettilik reıtıngi) bizdiń pozıtsııamyz nasharlap barady. Atalǵan reıtıngte 2017 jyly 73-orynda bolsaq, qazir 77-oryndamyz. Erlan (Saǵadıev - avt.), jumysty nasharlatyp jiberdiń...», - dedi Nursultan Nazarbaev.
Prezıdenttiń bul eskertpesine jaýap bergen mınıstr Saǵadıev shynynda da 2017 jyly Qazaqstan bilim salasy boıynsha atalmysh reıtıngte joǵary turǵanyn rastady.
«Asa aýqymdy jumystar atqaryldy. Kolledjder men JOO-daǵy, mekteptegi baǵdarlamalardy sizdiń tapsyrmańyz boıynsha aýystyrdyq. Oqýlyqtarmen jumys istedik, kadrlar daıarlandy. 2018 jyly keshendi kórsetkish boıynsha biz BEF JBQ reıtınginde álemde 57 orynǵa kóterildik. Biraq, Nursultan Ábishuly, 2017 jyly saýalnamalyq kórsetkish boldy ǵoı. Biz reformalardy qolǵa alǵaly bári shýlap jatyr. Gazetter shýlap jatyr. Halyqqa túsindirý jumystaryn júrgizip jatyrmyz. Sol sebepti saýalnamalyq kórsetkishte tómendedik», - dedi Erlan Saǵadıev.
Osy kezde Memleket basshysy mınıstrge «Nege shýlap jatyr? Elge túsindirý kerek. Onyń barlyǵyn balalar jaqsy oqýy úshin jasap jatyrmyz» dedi.
«Meniń oıymsha, osy jyly kórsetkishti aıtarlyqtaı jaqsartamyz», - dedi mınıstr.
Sóz sońynda Prezıdent mınıstrge «Durys joldasyń. Jaraısyń. JOO-larda da, mektepterde de sol jumystardy jalǵastyra ber» dedi.
Eske sala ketsek, Úkimet úıinde QR Prezıdenti Nursultan Nazarbaevtyń tóraǵalyǵymen Úkimettiń keńeıtilgen quramdaǵy otyrysy ótip jatyr. Elbasynyń qatysýymen Úkimettiń mundaı otyrysy jyl basynda turaqty túrde ótkiziledi. Búgingi jıynǵa Úkimet músheleri, Astana, Almaty jáne Shymkent qalalary men oblystardyń ákimderi, ortalyq memlekettik organdar men mınıstrlikter basshylary qatysýda.
