Erlan Saǵadıev: «Serpin» baǵdarlamasy boıynsha magıstratýrada oqýǵa grant bólinedi
ShYMKENT. QazAqparat - «Serpin» baǵdarlamasy boıynsha keler jyldan bastap magıstratýrada bilim alýǵa granttar bólinedi. Bul týraly búgin elimizdiń Bilim jáne ǵylym mınıstri Ońtústik Qazaqstan oblysynda Premer-Mınıstr Baqytjan Saǵyntaevtyń tóraǵalyǵymen ótken keńeste málim etti, dep habarlaıdy QazAqparat HAA tilshisi.
Mınıstr Erlan Saǵadıevtiń sózinshe, qazir «Serpin» baǵdarlamasymen bilim alǵan jastardy soltústik oblystarda qaldyrý qıynǵa soǵýda. Sondyqtan oqý oryndaryn bitirgender úshin jaǵdaı jasaý kerektigi atap ótildi.
«Bul másele boıynsha birqatar problema bar. Jas balalardy jibersek kolledjderdi bitirip, qalmaı, úılerine qaıtyp ketedi. Sondyqtan «Serpin» baǵdarlamasymen jumys isteýge daıyn, túsinikteri mol jastardy oqýǵa jiberse durys bolar edi. Sodan keıin kezeń-kezeńimen grant bóletin bolamyz. Kelesi jyly bakalavrıatty bitirgen jastarǵa magıstratýrada oqýǵa grant bólemiz», - dedi Bilim jáne ǵylym mınıstri.
Bul másele boıynsha Baqytjan Saǵyntaev soltústik óńirlerinen kelgen ákimdik ókilderine jastarǵa jaǵdaı jasaý jaǵyn qarastyrý qajettigin atap ótti. Sebebi oqý bitirgen soń turaqtaıtyn jeri joq stýdentter kóbine óz aýyldaryna qaıtýǵa májbúr bolady.
«Búgingi kúnde jastarǵa soltústik oblystaryna baryńdar deımiz. Ol barady, oqıdy. Tamaǵyn ishedi, jatady. Eki-úsh jyl júrgennen keıin turaqtaıtyn jeri joq. Ne jumys, ne turaqtaıtyn aǵaıyn-týys joq. Aýylyn saǵynady da qaıtyp keledi. Biren-sarany qalar, biraq negizinen qaıtyp ketedi. Eki-úsh jyldyń ishinde ol kishkene mamandyq aldy, beıimdeldi. Al biraq, degenmen de, júregi qaıta tartyp turady», - dedi Úkimet basshysy.
