Erlan Saǵadıev: Mektep bitirýshiler keshterine qatysty arnaıy tujyrymdama joq
ASTANA. QazAqparat - Mektep bitirýshiler keshterin ótkizýge qatysty bilim mekemeleriniń ákimshiligi, ata-analar keńesi ózderi sheshim qabyldaıdy. Bul týraly Ortalyq kommýnıkatsııalar qyzmetindegi baspasóz máslıhatynda QR Bilim jáne ǵylym mınıstri Erlan Saǵadıev málim etti, dep habarlaıdy QazAqparat tilshisi.
Mınıstr kóp suralatyn saýalǵa toqtala kele, túlekter keshin ótkizý úshin qomaqty aqsha jınalatyndyǵyn da atap ótti. Osy oraıda vedomstvo tarapynan bul máseleni baqylaýǵa alý máselesi kóterilmek.
«Osy keshti ótkizetin bizdiń arnaıy tujyrymdamamyz joq. Ol jyl saıyn uıymdastyrylatyn merekelik shara. Mektepter ózderi qalaı ótkizetindigin jaqsy biledi. Mekteptiń ákimshiligi, baqylaý keńesi, ata-analar keńesi jınalyp, sheshim qabyldaıdy. Ata-analar attestat tapsyrý resmı bóligine baryp, osydan keıingi sharalarǵa barmaýǵa quqyǵy bar. Osy oraıda ata-analardy saltanatty jıynnan keıingi merekeleý sharalaryna barýyna eshkim de májbúrlemeıdi», - dedi E.Saǵadıev.
Aıta keteıik, ótken jyly mańǵystaýlyq túlekter mektep bitirý keshine jınalǵan qarajatty qaıyrymdylyqqa jumsaǵan bolatyn.
