Erlan Saǵadıev Qyzylorda oblysynda bilim nysandarynyń ashylýyna qatysty
QYZYLORDA. QazAqparat-Búgin Qyzylorda oblysynyń bilim salasynda buryn-sońdy bolmaǵan kólemdegi bilim ordalary paıdalanýǵa berildi. Aral, Qazaly, Qarmaqshy aýdandarynda 6 mektep pen 2 balabaqshanyń ashylý saltanaty ótti, dep habarlady QazAqparat tilshisi oblystyq ákimdikke silteme jasap.
Mektep bitirýshilerdiń merekesi kúngi ıgi is-sharalarǵa oblysqa jumys saparymen kelgen QR Bilim jáne ǵylym mınıstri Erlan Saǵadıev qatysty.
Oblys ákimi Qyrymbek Kósherbaevpen birge soltústiktegi úsh aýdandy aralaǵan mınıstr qurylysy júrip jatqan bilim ordalarynyń jaı-kúıimen de tanysty. Qazaly aýdanynda sońǵy qońyraý sharasyna qatysyp, túlekterge sát-sapar tiledi.
Shara barysynda oblys ákimi Memleket basshysy qoıǵan tapsyrmaǵa sáıkes 2020 jylǵa deıin úsh aýysymda oqıtyn mektepterdi joıý máselesine oraı, ótken jyly 25 mektep soǵylǵanyn, bıylǵy jyldyń tamyz aıynda aımaqta ondaı bilim ordalarynyń tolyqtaı bolmaıtynyn atap ótti. Bóbekterdi balabaqshamen qamtý oblys kóleminde tolyqtaı sheshimin tapqanyna da toqtaldy. Osylaısha Elbasy qoıǵan tapsyrmalardyń ýaqytynan buryn iske asyp jatqanyn jetkizdi.
