Erlan Saǵadıev balalardyń qaýipsiz demalysyn qalaı qamtamasyz etpek
ASTANA. QazAqparat - Bıyl halyqtyń áleýmettik osal toptarynan shyqqan balalardyń jazǵy demalysyn uıymdastyrý shin jergilikti bıýdjet esebinen 4 mlrd teńgege jýyq qarajat bólindi. Bul týraly búgin Úkimet otyrysynda QR Bilim jáne ǵylym mınıstri Erlan Saǵadıev aıtty, dep habarlaıdy QazAqparat tilshisi.
«Kanıkýl kezinde balalardy barynsha qaýipsiz demalyspen qamtamasyz etý úshin keıbir máselelerdi kóterý kerek bolyp tur. Árıne, kóptegen ata-analar jazda balalarynyń qala syrtyndaǵy lagerlerde demalǵanyn qalaıdy. Alaıda óńirlerde jumys istep turǵan qala syrtyndaǵy lagerler barlyq balany demalyspen qamtýǵa jetpeıdi», - dedi mınıstr.
Onyń aıtýynsha, halyqtyń áleýmettik osal toptarynan shyqqan balalardyń jazǵy demalysyn uıymdastyrý úshin jergilikti bıýdjet esebinen 4 mlrd teńgege jýyq qarajat bólingen.
«Osyǵan baılanysty jergilikti atqarýshy organdarǵa atalǵan sanattaǵy balalardyń demalysyn basqa oblystardaǵy lagerlerde uıymdastyrý jaǵyn qarastyrýdy usynamyz. Jyl saıyn mınıstrliktiń «Baldáýren» jáne «Qapshaǵaı Baldáýren» respýblıkalyq ortalyqtarynda barlyq óńirden keletin 9 myńǵa jýyq balanyń demalysy uıymdastyrylady. Jergilikti atqarýshy organdarda elimizdiń kórshiles óńirlerde balalardyń demalysyn uıymdastyrý tájirıbesi bar. Osyǵan arnaıy nazar aýdarýdy suraımyn», - dedi Erlan Saǵadıev.
Mınıstrdiń atap ótýinshe, aımaqtarda balalardyń jazǵy demalysyn uıymdastyrýdyń dınamıkasy durystyǵyn tekserý qajet. Byltyrǵy jyly osy máseleni zerdeleý úshin qoǵamdyq baqylaý mehanızmi engizilgen.
«Respýblıkanyń barlyq óńirinde qurylǵan qoǵamdyq komıssııa quramyna ÚEU jáne ata-analar keńesteriniń ókilderi kirdi. Komıssııa tarapynan 12 myńnan astam lagerdiń jumysyna monıtorıng júrgizildi. Nátıjesi boıynsha qalalyq jáne aýdandyq ákimderge naqty usynystar berilgen bolatyn. Osy jumysty aǵymdaǵy jyly da jalǵastyrýdy qajet dep oılaımyz», - dedi ol.
