Erlan Saǵadıev ashyq pikirtalastan bas tartty
ASTANA. QazAqparat - QR Bilim jáne ǵylym mınıstri Erlan Saǵadıev "Bolathan Taıjan" qorynyń prezıdenti Muhtar Taıjanmen teledebattan bas tartty. Buǵan deıin Muhtar Taıjan áleýmettik jeli arqyly mınıstrdi úsh tuǵyrly til jáne qazaq tarıhy týraly ashyq pikirtalasqa shaqyrǵan bolatyn, dep habarlaıdy QazAqparat.
«Taıjanǵa qatysty aıtar bolsam, bul meniń qyzmetime jatpaıdy dep esepteımin. Maǵan ol qyzyq emes jáne onymen kezdesýdi de kózdep otyrǵanym joq», - dedi bilim mınıstri búgin Úkimet úıinde jýrnalısterdiń saýalyna jaýap bere kele. Eske salaıyq, Úkimette «100 naqty qadam» Ult josparynyń áleýmettik jáne bilim salalary boıynsha júzege asyrylýyna arnalǵan brıfıng ótken bolatyn.
Aıta ketý kerek, taıaýda «Habar» arnasynda QR Densaýlyq saqtaý mınıstri Eljan Birtanov pen «Talap» qoldanbaly zertteýler ortalyǵynyń dırektory Rahym Oshaqbaev arasynda mindetti medıtsınalyq saqtandyrý júıesine qatysty pikirtalas boldy. Osydan keıin Muhtar Taıjan da Feısbýk arqyly Bilim jáne ǵylym mınıstri Erlan Saǵadıevti ashyq pikirtalasqa shaqyrǵan edi.
