Erlan Nysanbaev uzaq merzimdi orman paıdalanýǵa tyıym salýdy usyndy
«2003 jyldan ákimdikter qaraýyndaǵy orman sharýashylyqtarynda uzaq merzimdi orman paıdalaný ınstıtýty engizildi. Solaı bola tura súrek daıyndaýdy orman paıdalanýshylar 4 oblysta ǵana júrgizedi. Bul orman sharýashylyǵy is-sharalaryn kásipkerlerdiń qosymsha qarjylandyrýy jolymen bıýdjetke túsetin qarjy júktemesin azaıtady dep kózdelgen bolatyn. Jasalǵan taldaý uzaq merzimdi orman paıdalanýdyń tıimdiligi tómen ekenin kórsetti. Orman paıdalanýshylar aǵash otyrǵyzý jáne órtke qarsy is-sharalar boıynsha sharttyq mindettemelerdi oryndamaıdy, sondaı-aq salyq tólemderi boıynsha bereshektiń oryn alyp otyrǵany baıqalady», - dedi ol.
Sonymen birge onyń aıtýynsha, tekserýler barysynda daıyndalǵan súrek kóleminiń ruqsat etilgen kólemnen asyp ketýiniń býhgalterııada kórsetilmeıtin tym óreskel faktileri anyqtaldy. Munan bólek, is júzinde barlyq orman paıdalanýshylar tehnıkany qaıta jaraqtandyrýǵa qarajat bólmegen. Qorshaǵan ortaǵa barynsha az zııan keltiretin zamanaýı arnaıy dońǵalaqty tehnıkanyń ornyna kúni búginge deıin eski shynjyr tabandy tehnıkany paıdalanýda.
«Máselen, Shyǵys Qazaqstan oblysynyń orman paıdalanýshylary ǵana sońǵy 5 jylda 342 myń tekshe metr súrek daıyndap, tasyp áketti. Bul oraıda bórene kúıinde ǵana súrek ótkizýden túsken tabystyń eń az mólsheri 1 mlrd teńgeden asyp túsedi. Solaı bola tura dúnıejúzilik tájirıbe Qytaı, Ýkraına, Norvegııa sııaqty birqatar elderde jáne basqa da memleketterde aǵash kesýdiń barlyq túrine tyıym salynǵanyn kórsetedi, al bul elderdiń ormandy jerleriniń kólemi Qazaqstan kórsetkishterinen birneshe ese asyp túsedi. Osy aıtylǵandardy eskere otyryp, súrek daıyndaý boıynsha uzaq merzimdi orman paıdalanýǵa tyıym salý jáne qajetti orman sharýashylyǵy is-sharalaryn júrgizýdi, budan buryn bolǵanyndaı, memlekettik mekemelerdiń ózderine júkteý máselesin qaraý qajet dep esepteımiz. Bul máseleniń mańyzdylyǵyna baılanysty jurtshylyqpen, orman paıdalanýshylarmen, ulttyq kásipkerler palatasymen, oblystar ákimdikterimen arnaıy talqylaýlar ótkizip, olardyń qorytyndylary boıynsha Úkimetke tıisti usynys jasalatyn bolady», - dedi Erlan Nysanbaev.