Erlan Nysanbaev aldaǵy 10 kúngi aýa raıy boljamyn jarııalady
ASTANA. KAZINFORM – Aldaǵy 10 kúnde elimizdiń basym bóliginde jaýyn-shashyn mol túsedi. Bul týraly Úkimet otyrysynda Ekologııa jáne tabıǵı resýrstar mınıstri Erlan Nysanbaev aıtty.
«Boljamǵa sáıkes 2024 jyldyń 1-10 sáýir aralyǵynda Qazaqstan aýmaǵynyń basym bóliginde aýa raıynyń turaqsyzdyǵy kútiledi. Respýblıkanyń basym bóliginde jaýyn-shashyn normaǵa jaqyn, al eldiń ońtústik, ońtústik-shyǵys jáne shyǵystyń taýly jáne taý bókterindegi aýdandarda normadan kóp bolady dep boljanyp otyr. Sáýirdiń birinshi onkúndiginiń basynda jáne ekinshi jartysynda respýblıkanyń basym bóliginde túngi ýaqytta jańbyr túrindegi jaýyn-shashyn qarǵa aýysyp, kúndiz jańbyr jaýady dep boljandy. Eldiń ońtústigi men ońtústik-shyǵysynda jańbyr bolady», - dedi mınıstr.
Onyń dereginshe, qatty jaýyn-shashyn respýblıkanyń shyǵysynda 3 jáne 10 sáýirde, ortalyqta jáne ońtústik-shyǵysta 8-9 sáýirde, Túrkistan, Almaty oblystarynda jáne Jetisý oblysynda 9 sáýirde bolady dep boljanyp otyr. Jaýyn-shashynnyń toqtaýy eldiń batysynda birinshi onkúndiktiń basynda, respýblıkanyń kóp bóliginde onkúndiktiń ortasynda bolýy múmkin. Onkúndiktiń basynda soltústikte, soltústik-batysta, shyǵysta, eldiń ortalyǵynda aýa temperatýrasynyń tómendeýi túnde 2-7 gradýs aıazdy, kúndiz 3-8 gradýs jylýdy kórsetedi. 4 sáýirden bastap birtindep túnde 0-5 gradýs jylýǵa deıin, kúndiz 12-20 gradýsqa deıin joǵarylaıdy, eń jyly temperatýra 5-7 sáýirde bolady jáne onkúndiktiń sońynda temperatýra tómendeıdi.
«Rosgıdromettiń málimeti boıynsha, Reseı aýmaǵynda qardyń qarqyndy erýine baılanysty Jaıyq ózeniniń basseıninde muzdyń buzylýy jáne sý deńgeıiniń kóterilýi bastalatynyn aıtyp ótken jón. Osyǵan baılanysty sáýir aıynyń ekinshi jartysynda Oral ózeniniń basseıninde jyl saıynǵy sý tasqyny bolady dep boljandy. Gıdrologııalyq jáne meteorologııalyq jaǵdaılar kúrt ózgergen jaǵdaıda, Qazgıdromet sý tasqyny qaýpi týraly daýyldy aldyn ala eskertýmen habardar etýdi jalǵastyratyn bolady», - dedi Erlan Nysanbaev.
