Erlan Qusaıyn Qaraǵandy oblysy Buqar jyraý aýdanynyń ákimi bolyp taǵaıyndaldy
QARAǴANDY. KAZINFORM – Prezıdent Ákimshiliginiń jáne aýdandyq máslıhat depýtattarynyń kelisimi boıynsha Erlan Qusaıyn Buqar Jyraý aýdanynyń ákimi bolyp taǵaıyndaldy. Buǵan deıin ol Qaraǵandy oblysy ákiminiń orynbasary qyzmetin atqarǵan, dep habarlaıdy Kazinform tilshisi.
Aýdannyń jańa ákimin óńir basshysy Ermaǵanbet Bólekpaev tanystyryp, onyń aldyna birqatar mindet qoıdy.
– Sizdiń basty mindetińiz – aýdan turǵyndarynyń ómir súrýine qolaıly jaǵdaı jasaý. Egin jınaý naýqanynyń ýaqtyly aıaqtalýyn jáne josparlanǵan kórsetkishterge qol jetkizýin qamtamasyz etý qajet. Áleýetti ınvestorlarmen, memlekettik qoldaý quraldary boıynsha bıznespen belsendi jumys isteńiz. Jastar kásipkerligi men startaptardy damytýǵa nazar aýdaryńyz. Agrarlyq bıznes ókilderiniń shaǵymdary men suraqtaryna muqııat qarańyz. Aýdanda ashyqtyq pen jarııalylyq qaǵıdattarynda jumysty uıymdastyrý qajet, - dep atap ótti Ermaǵanbet Bólekpaev.
Erlan Qusaıynnyń úsh joǵary bilimi bar: Bóketov atyndaǵy Qaraǵandy memlekettik ýnıversıtetin «Qazaq tili men ádebıeti oqytýshysy» mamandyǵy boıynsha, Qaztutynýodaǵy Qaraǵandy ekonomıkalyq ýnıversıtetin «ekonomıka salasyndaǵy quqyqtyq retteý» mamandyǵy boıynsha, QR Prezıdenti janyndaǵy Memlekettik basqarý akademııasynyń magıstratýrasyn bitirgen.
Eńbek jolyn 1999 jyly bastaǵan. 2007 jyldan bastap memlekettik qyzmette. Qaraǵandy oblysy Kásipkerlik jáne ónerkásip departamentiniń qarjy, uıymdastyrý jáne kadr jumysy bóliminiń bas mamany boldy.
2008 jyldan 2014 jylǵa deıin Qaraǵandy oblysy ákiminiń baspasóz qyzmetinde túrli qyzmetter atqardy. Sodan keıin Buqar jyraý aýdany ákiminiń orynbasary bolyp jumys istedi. Qaraǵandy oblysy ákimi apparatynyń Qazaqstan halqy Assambleıasynyń Hatshylyǵyn basqardy. Qaraǵandy oblysy ákimi apparatynyń «Qoǵamdyq kelisim» KMM dırektory, ishki saıasat basqarmasynyń basshysy, Qarqaraly aýdanynyń ákimi boldy.
2023 jyldyń qarasha aıynan bastap osy taǵaıyndaýǵa deıin Qaraǵandy oblysy ákiminiń orynbasary qyzmetin atqardy.
