Erlan Qojaǵapanov: Astanadaǵy aýyr atletıkadan Azııa chempıonaty elimiz ben ózge elderdiń jańa juldyzdaryn shyǵaratyny daýsyz
ASTANA. 22 maýsym. QazAqparat - 21 maýsym kúni Astana qalasyndaǵy «Saryarqa» velotreginde erler men áıelder arasyndaǵy aýyr atletıkadan Azııa chempıonatynyń saltanatty ashylýy bolyp ótti.
Qazaqstan memleketiniń Ánuranymen ashylǵan mańyzdy shara mádenı sán-saltanatymen erekshelendi. Shetelden kelgen qonaqtar aldynda qazaq halqynyń án men kúı óneri pash etildi. Osy keshte jınalǵan qonaqtar elimizde aýyr atletıkanyń damýy 1930 jyldardan bastaý alatyny týraly, Qazaqstannyń Keńes odaǵy quramynda bolǵan kezindegi áıgili sportshylar jáne táýelsiz memlekettiń týyn kókke kótergen tolaǵaılarymyz jaıly beınekórsetilimdi tamashalady.
Jınalǵandar aldynda sóz sóılegen QR Sport jáne dene shynyqtyrý isteri agenttiginiń tóraǵasy Erlan Qojaǵapanov: «Álemde aýyr atletıkanyń qarqyndy damyp kele jatqany barshańyzǵa málim. Bizdiń elimizde de sporttyń osy túri jaqsy damý ústinde dep maqtanyshpen aıta alamyz. Oǵan dálel - Londonda ótken Olımpıadadaǵy qyzdarymyz ben Ilıa Ilınniń jetistikteri, altyn medaldary. Bolashaqta da jetistikterimiz joǵary bolady dep úmittenemiz jáne senemiz!»,- dedi.
Odan ári sózin jalǵaǵan agenttik tóraǵasy Azııa chempıonatynyń tamasha kórikti jáne jas Astanamyzda ótip otyrǵany biz úshin úlken qýanysh ekenin, munyń bári el Prezıdenti - Elbasy Nursultan Ábishuly Nazarbaevtyń qoldaýy men erekshe mán berýiniń arqasynda júzege asyp otyrǵanyn atap ótti.
«Bul chempıonat bizdiń elimizdiń jáne ózge memleketterdiń ókilderi arasynan kóptegen jańa juldyzdardy shyǵaratyny daýsyz. Men osy chempıonatty ótkizýge qoldaý jasaǵany úshin Azııa aýyr atletıka federatsııasyna aıryqsha rızashylyǵymdy bildiremin. Bul dodaǵa qatysýǵa kelgen sportshylarǵa da alǵys aıtamyn»,- dedi Erlan Qojaǵapanov.
