Erlan Qoshanovtyń qalalyq qoǵamdyq kólikterdiń jumysyna kóńili tolmaıdy
ASTANA. QazAqparat - Qaraǵandy oblysynyń ákimi Erlan Qoshanov apparattyq jınalys barysynda qoǵamdyq kólikterdiń jumysyna qanaǵattanbaıtynyn bildirip, qala basshylyǵyna sógis aıtty, dep habarlaıdy ákimdiktiń resmı saıty.
Qaraǵandy qalasynyń ákimi Nurlan Áýbákirov ázirge tek aýyzsha eskertpe aldy, al onyń orynbasaryna tártiptik jaza qoldanylady. Aımaq basshysy bir aı ýaqyt aralyǵynda barlyǵyn tártipke keltirýdi qatań tapsyrdy.
«Meniń tapsyrmam boıynsha arnaıy top eki apta boıy Qaraǵandydaǵy qoǵamdyq kólik jumysyn qadaǵalap shyqty. Atalmysh tekseris nátıjeleri men qorytyndylar oıǵa qonymsyz», - dedi Erlan Qoshanov.
Oblys ákimi árbir eskertpelerdi tarmaqtap atap shyqty. Birinshisi - baǵyttar kestesi joq, aıaldamalarda marshrýt kestesi jazylǵan taqtaıshalar joq. Ekinshiden - marshrýttarda belgilengen avtobýstar sany sáıkespeıdi. Úshinshiden - qarbalas sátterde avtobýstar aıaldamalarda kútip turǵan jolaýshylardy kerek qylmaı, ótip ketedi. Tórtinshiden - jolaýshy tasymaldaıtyn kólikterdiń júrgizýsheleri únemi jol erejelerin buzady.
«Tenderlik qujattamada marshrýtta 17 avtobýs kórsetilgen, al is júzinde kún saıyn tek 9-10 kólik shyǵady. Osy sekildi jaǵdaıda qandaı turaqtylyq bolýy múmkin? Avtobýs júrgizýshileriniń barlyq jumysy tabys tabýǵa ǵana baǵyttalǵan. Sondyqtan jolaýshylar úshin olar tartys, jarys ótkizedi», - dep narazylyǵyn bildirdi Erlan Qoshanov.
Ol jolaýshy tasymaldaýshylardyń jumysyna turǵyndar tarapynan kóptegen shaǵymdar kelip túsetinin aıtty.
«Qala basshylyǵy avtoparktermen jumys jasamaıdy. Eshkim olardy tártipke shaqyrmaıdy. Jolda júrý mádenıeti tipten joq. Osyndaı jaǵdaı tek Qaraǵandyda ǵana. Temirtaý jáne basqa qalalarda avtobýs júrgizýshileri tipti galstýkpen júredi», - dep salystyrdy aımaq basshysy. Barlyǵyn tártipke keltirýge ol bir aı ýaqyt berdi.
«Osy másele boıynsha men Qaraǵandy qalasynyń ákimine eskertpe aıtamyn. Al ákimniń kólik máselelerin qadaǵalaıtyn orynbasaryna tártiptik jaza jarııalansyn. Qoǵamdyq kólik jáne avtomobıl joldary basqarmasy, sizderge de sógis aıtamyn. Budan ári basqasha qorytyndy jasaıtyn bolamyz, - dep eskertti Erlan Qoshanov. - Bir aıdan soń bul máselege qaıta oralamyz. Barlyǵyn retke keltirińizder. Avtoparktermen jumys isteńizder. Qandaı da bir áser etetin tetikterińiz bolsa, solardy qoldanyńyzdar».
Sonymen birge joldardaǵy tártipke qatań baqylaý júrgizýdi oblys ákimi jergilikti polıtsııa qyzmetine de tapsyrdy.
