Erlan Qoshanov jyl saıyn 100 aýlany abattandyrýdy usyndy
QARAǴANDY. QazAqparat - Oblys ákimi Erlan Qoshanov jyl saıyn Qaraǵandynyń júzge jýyq aýlalaryn jóndep otyrýdy usyndy, dep habarlaıdy QazAqparat ákimniń baspasóz qyzmetine silteme jasap.
Oblys ortalyǵynda barlyǵy 756 aýla bar. Onyń jartysynan kóbi jóndeýdi qajet etedi.
«Men qarap otyrmyn, osy jyly nebári on turǵyn úıdiń mańyn jóndeýge qarajat bólingen eken, - dedi ol depýtattarmen jáne Qaraǵandy qalasy qoǵamdyq keńes múshelerimen kezdesý barysynda. - Ol degenimiz óte az. Ondaı jaǵdaıda 386 aýla qaraýsyz qalady. Jóndeý jumystaryna, meniń túsinýimshe, óte kóp qarajat qajet. Sondyqtan eń negizgi qajettilikterdi: asfalt aýystyrý, shamdar, oryndyqtar men turaqtar ornatýdy oılastyrǵan jón dep oılaımyn. Osylaısha biz jylyna júzge jýyq aýlalardy jóndep, bes-alty jylda abattandyrý boıynsha máseleni tolyq sheshe alamyz», - dedi E. Qoshanov.
Aımaq basshysynyń aıtýynsha, birinshi kezekte basqarýshy mekemelerge bekitilgen aýlalardy jóndeý kerek.
Sonymen qatar qoǵamdyq keńes músheleri qarajatty únemdeý maqsatynda, abattandyrý tizimine úı turǵyndary ózderiniń úlesterin qosa alatyn aýdandardy qosýdy usyndy.
