Erlan Qoshanov Jezqazǵanda jol jóndeýdi sapasyz júrgizgen merdigerlerge shúılikti
ASTANA. QazAqparat - Erlan Qoshanov óziniń orynbasarlary men basqarma basshylaryna jol sapasyn qatań baqylaýǵa alýdy tapsyrdy, al alaqol merdigerlerdi qara tizimge jiberetinin aıtty, dep habarlaıdy Qaraǵandy oblysy ákimdiginiń resmı saıty .
Jezqazǵannyń aldaǵy úsh jylǵa damý jospary sheńberinde joldar men kólikterge shamamen 8 mlrd teńge bólinbek. Bıylǵy jyly munda jalpy somasy 2,4 mlrd teńgege jumystar júrgiziledi. Olardyń qataryna jol qabatyn, jol ótpelerin aǵymdyq jáne ortasha jóndeýden ótkizý, temirjol salasyn, avıabalanysty damytý, jol qaýipsizdigin qamtamasyz etý enedi. Qaraǵandy-Jezqazǵan baǵytyndaǵy respýblıkalyq mańyzy bar jolda jalpy somasy 1,6 mlrd teńgege 156 shaqyrym jóndeýden ótkizilýde. Oblystyq mańyzy bar Jezqazǵan jáne Sátbaev qalalary arasyndaǵy, áýejaıǵa aparatyn joldarda ortasha jóndeý jumystary atqarylýda, jaryqtandyrý jumystary júrgizilýde. Sonymen qatar oblystyq bıýdjet transfertteri esebinen Jezqazǵannyń negizgi ortalyq №5, №6 jol ótpeleriniń 14 shaqyrymy ortasha jóndeýden ótkizilip jatyr. Sonymen qatar 9 oramaralyq joldar qala bıýdjeti esebinen jóndelýde.
Aımaq basshysy keı ýchaskilerdegi jóndeý jumystaryn óz kózimen kórip qaıtty. Qaraǵandy oblysynyń ákimi nazaryna «Qaraǵandyjolzerthana» KMM-niń mobıldi zerthanasy usynyldy. Bul tehnıka ótken jyly 75 mln teńgege satyp alynǵan. Atalmysh zerthananyń artyqshylyǵy - úlgiler nátıjesin alýdaǵy jedeldik ári zertteme qorytyndylarynyń dáldigi.
Ákim 6 jol ýchaskilerinde tender utyp alǵan «KazTransEnergo» merdiger uıymnyń jumysyna narazylyǵyn bildirdi. Erlan Qoshanov óziniń orynbasarlaryna, basqarma basshylaryna jáne Jezqazǵan qalasynyń ákimine jasalyp jatqan jumystardy qatań baqylaýǵa alýdy tapsyrdy.
- Taǵy bir márte materıaldardyń sapasyn tekserińizder, - dep tapsyrdy oblys ákimi. "Meniń bilýimshe, bul mekeme 6 myń sharshy metr aýmaqty qaıta jóndeýge májbúrlengen. Qajet bolsa qaıta jóndesin. Asfalttyń úlgisin alyńyzdar. Sonan soń kesh bolmasyn. Ol úlgilerdi Almatyǵa, táýelsiz zerthanalarǵa jiberińizder. Qatań baqylaý qajet".
