Erlan Qoshanov «Jezqazǵan-Sátbaev» jolynda qaýipsizdikti qamtamasyz etýdi tapsyrdy
QARAǴANDY. QazAqparat - Qaraǵandy oblysynyń ákimi Erlan Qoshanov «Jezqazǵan-Sátbaev» jolynyń ýchaskesindegi jóndeý jumystarynyń barysymen tanysyp qaıtty, dep habarlaıdy QazAqparat tilshisi.
Jezqazǵan men Sátbaev qalalarynyń aralyǵyndaǵy joldy 2020 jyldyń qazan aıynda tolyq aıaqtalady dep josparlanýda. Alaıda óńir basshysy qazirden bastap kólik júrgizýshilerdiń qaýipsizdigin qamtamasyz etýdi tapsyrdy.
«Qyrkúıek aıyna qaraı, múmkin bolǵan bette, joldy bóletin belgiler men jolaqtar ornatyńyzdar. Jaz bastalǵannan beri osy bólikte kóptegen apat bolady, onyń ishinde, ókinishke oraı, kisi ólimimen aıaqtalǵandary da bar. Bul jol «ólim jolyna» aınalyp barady. Jaǵdaıdy túzetý kerek», - dedi óńir basshysy.
Merdigerler, óz kezeginde, tapsyrmany tez oryndaýǵa ýáde berdi.
Qazirgi tańda jóndeletin ýchaskede 20 adam jáne 19 tehnıka, onyń ishinde asfat taptaýysh, avtogreıder, asfalt tósegishter jumys isteıdi.
Osy jyldyń sońyna deıin merdiger kompanııa jol tósemin asfaltbetonmen tegistep, jol jabynyn jaılastyrý jáne jol jıegin 10 santımetr qıyrshyqtas qabatymen tyǵyzdaýy tıis.
Kelesi jyly jospar boıynsha Jezqazǵan men Sátbaevtyń arasynda tas tóselgen jaıly aıaldama pavılony, jıek tastar, trassa boıyndaǵy metall qorshaýlar men kóshe shamdary paıda bolady.
