Erlan Qoshanov jergilikti ákimderden jıirek jaıaý júrýlerin talap etti
ASTANA. QazAqparat - Qaraǵandy oblysynyń ákimi Erlan Qoshanov bıznes nysandarynyń aýmaqtaryn jónge keltirýdi tapsyrdy. Aımaq basshysy jergilikti ákimder jaǵdaıdy óz jumys oryndarynyń terezelerinen nemese kólikteriniń ishinde otyryp baqylamaı, jıirek jaıaý aralap shyǵýdy talap etti. Bul týraly ákimniń baspasóz qyzmeti habarlady.
«Bıznes nysandary aýmaqtarynyń basym bóligi kóńil toltyrmaıdy. Eshkim bul máselemen aınalyspaıdy, - dep apparattyq jınalysta Erlan Qoshanov qyzmetkerlerge óziniń narazylyǵyn bildirdi. - Ákimder, óz qyzmetkerlerińizben birge qalany aralyp shyǵyńyzdar».
Ol mysal retinde Qaraǵandy qalasyndaǵy City Mall saýda - oıyn-saýyq ortalyǵyn keltirdi. «Kelissózden soń ortalyq ıeleri abattandyrý jobasyn qurdy, kelesi aptady ony ortaǵa salýdy josparlap otyr. Joba quptalǵan bette jumystaryn bastaıdy. Mine, dál osylaı árbir nysan boıynsha jeke jumys jasaý kerek», - dedi oblys ákimi.
Aımaq basshysy qala jáne aýdan ákimderine kásipkerler palatasymen birigip, shaǵyn jáne orta bıznes nysandarynyń mańaıynda abattandyrý jumystaryn uıymdastyrýdy tapsyrdy.
Erlan Qoshanov sonymen qatar adamdardyń qaýipsizdigi týraly tapsyrmasyn da eske aldy. «Temirtaý qalasyndaǵy stadıonnyń mańyndaǵy balalar alańqaıynyń jańdaıy tipti nashar. Al onyń qurylysyna 300 mln teńge jumsalaǵan bolatyn», - dedi oblys ákimi qala ákimine qarata aıtqan sózinde.
