Erlan Qoshanov: Ulytaýdy elimizge ǵana emes, álemge tanytqymyz keledi
ASTANA. QazAqparat - Qaraǵandy oblysynyń ákimdigi Ulytaý óńirine keletin týrısterdiń sanyn arttyrý úshin eń aldymen jol jóndeý jumystaryna mańyz berip otyr. Bul týraly «Rýhanı jańǵyrý» baǵdarlamasyn Qaraǵandy oblysynda iske asyrýdyń birinshi jylyn qorytyndylaǵan óńir basshysy Erlan Qoshanov málim etti, dep habarlaıdy QazAqparat tilshisi.
«Tarıhı turǵydan mynadaı túsinik qalyptasyp qaldy: Qaraǵandy dese kóp adamnyń oıyna ásirese shahtasy, ındýstrııamen birge KarLAG, repressııa túsedi. Mine, osy túsinikti biz buzsaq deımiz. Sebebi, Qaraǵandy oblysy Ulytaýdyń arqasynda Qazaq memlekettiliginiń altyn besigi degen mártebege ıe bolǵanyn qalaımyz», - deıdi Erlan Qoshanov.
Óńir ákimi óziniń jastyq shaǵy Ulytaý aımaǵynda ótkenin eske aldy. Aıtýynsha, jas kezinde úlken aqsaqaldar «Eger solaqaı júıeniń qoly jetpegen bir jeri bolsa - ol qaımaǵy buzylmaı, qalpynda qalǵan Ulytaý» dep aıtyp otyrady eken.
«Ulytaý - ulylar joly, handar joly, qazaq halqynyń taǵdyr joly. Ulytaý qazaqtyń basyn biriktirgen qasıetti meken. Elbasy budan biraz jyl buryn Ulytaýdyń baýraıynda bergen suhbatynda «Ulytaý qazaq eliniń kóne zamanynan bergi tarıhı jáne saıası kindigi» dep atap kórsetken bolatyn. Biz Ulytaýdy elimizge ǵana emes, álemge tanytýdy josparlap otyrmyz. Sebebi, Ulytaý - álemdik deńgeıde bıik oryn alýǵa laıyqty qazaqtyń injý-marjany», - deıdi Erlan Qoshanov.
Oblys basshysynyń aıtýyna qaraǵanda, Ulytaýdy álemge tanytýǵa qaraǵandylyqtar ǵana emes, barsha qazaqstandyqtar atsalysýy kerek. Sebebi, Ulytaý - elge kórsetýge laıyqty tarıhı muralary óte kóp óńir.
«Ol úshin ne qajet? Árıne, óńirge eń aldymen, myqty, damyǵan ınfraqurylym kerek. Óıtkeni, Ulytaýdyń basty máselesi - joldyń qashyqtyǵy jáne sol baratyn joldyń óte qıyndyǵy. Sondyqtan, biz áýeli jumysty avtojoldardy jóndeýden bastadyq. Osy maqsatpen 5 mlrd teńge qarjyǵa byltyr bastalǵan Qaraǵandy-Jezqazǵan jolyn jóndeý jumystaryn biz bıyl tolyq aıaqtaımyz. Eger byltyr osy jolmen júrip ótýdiń ýaqyty - 7-8 saǵat bolsa, qazir 4,5-5 saǵattyń ishinde júrip ótesiz. Sol sııaqty bıyl biz Alasha han, Joshy han kesenelerine, Han Ordasy men Altyn shoqy tarıhı oryndaryna aparatyn jalpy uzyndyǵy 100 shaqyrym joldy jóndeý jumystaryn bastadyq», - deıdi óńir ákimi.
Onyń aıtýynsha, joldyń qıyndyǵyna qaramastan, byltyr Ulytaýǵa 11 myńǵa jýyq týrıst barǵan.
«Al bul óńirge jylyna kem degende 50 myńǵa jýyq týrısti qabyldaýǵa múmkindik bar. Bizdiń maqsatymyz - týrısterdiń sanyn osy mejege jetkizý úshin barlyq jaǵdaılardy jasaý», - dep túıdi Erlan Qoshanov.
