Erlan Qoshanov UQShU alańynda Qazaqstannyń jańa Konstıtýtsııasyn tanystyrdy
ASTANA. KAZINFORM — Májilis tóraǵasy Erlan Qoshanov bastaǵan Qazaqstan Parlamentiniń delegatsııasy Ujymdyq qaýipsizdik týraly shart uıymynyń Parlamenttik Assambleıasy Keńesiniń otyrysyna qatysty. Bul týraly Májilistiń Baspasóz qyzmeti málim etti.
UQShU Parlamenttik Assambleıasy Keńesiniń otyrysynda sóz sóılegen Erlan Qoshanov qatysýshylardy Uıymnyń 20 jyldyǵymen quttyqtady. Ol osy ýaqytta Parlamenttik Assambleıa UQShU ujymdyq qaýipsizdik júıesiniń mańyzdy elementine aınalǵanyn, múshe memleketter arasyndaǵy tıimdi parlamenttik ózara is-áreketti qamtamasyz etkenin atap ótti.
Májilis spıkeri qazirgi jahandyq saıası turaqsyzdyq jaǵdaıynda parlamenttik dıplomatııa beıbitshilik pen jalpyǵa ortaq órkendeý jolyndaǵy mańyzdy biriktirýshi tetikke aınalyp kele jatqanyna nazar aýdardy.
Erlan Qoshanov áriptesterin jalpyrespýblıkalyq referendýmda qazaqstandyqtardyń basym kópshiligi qoldaǵan jańa Konstıtýtsııanyń negizgi erejeleri týraly habardar etti.
– Prezıdenttiktiń alǵashqy kúnderinen bastap Qasym-Jomart Kemeluly Toqaev mańyzdy saıası reformalarǵa bastamashy boldy. Jańa Konstıtýtsııa olardyń logıkalyq nátıjesine aınaldy. Memleket basshysynyń bastamasy boıynsha, Ádiletti jáne Progressıvti Qazaqstan qurý Ata zańnyń basty maqsaty retinde bekitildi. Adamnyń múddelerine baǵyttalý prıntsıpi jańa ári tereń mazmunmen tolyqty. Adam, onyń quqyqtary men bostandyqtary memlekettiń basty qundylyǵyna aınalyp otyr. Konstıtýtsııada Kúshti Prezıdent, yqpaldy Parlament jáne esep beretin Úkimet teńgerimi bekitildi. Biz qos palataly Parlamentten bir palataly Parlamentke ótemiz. Oǵan Quryltaı ataýy berildi, onyń músheleri tek partııalyq tizimder boıynsha saılanady, – dedi Májilis spıkeri.
UQShU parlamentshileri jańa ınstıtýttar – Vıtse-prezıdent pen Halyq keńesi qurylǵany týraly, sondaı-aq prezıdenttik basqarý nysany Konstıtýtsııada bıliktiń barlyq tarmaqtary jumysynyń úzdiksizdigin, júıeliligi men kelisimdiligin qamtamasyz etýdiń kepili retinde bekitilgeni týraly habardar boldy.
Assambleıa jumysyna toqtalǵan Májilis tóraǵasy UQShU-ǵa múshe memleketterdiń ulttyq zańnamalaryn úılestirýdi jaqyndastyrý boıynsha depýtattardyń júıeli jáne jemisti jumys atqarǵanyna nazar aýdardy. Assambleıa qabyldaǵan modeldik zańdardyń aýqymy óte keń, onda ujymdyq qaýipsizdikten bastap terrorızmge, ekstremızmge, zańsyz esirtki aınalymyna jáne transulttyq qylmysqa qarsy is-áreketke deıin qamtylǵan.
Otyrys barysynda delegattar UQShU Ujymdyq Qaýipsizdik Keńesiniń qarasha aıyndaǵy sessııasynyń sheshimderin, ujymdyq qaýipsizdiktiń syn-qaterleri men qaýipterine qarsy is-áreket jónindegi sharalardy, sondaı-aq UQShU-ǵa múshe memleketterdiń ulttyq zańnamasyn jaqyndastyrý jáne úılestirý jónindegi Ujymdyq qaýipsizdik týraly UQShU Parlamenttik Assambleıasy qyzmetiniń 2026-2030 jyldarǵa arnalǵan baǵdarlamasyn iske asyrý barysyn talqylady.
Eske sala keteıik, jaqynda Taalatbek Masadykov Qasym-Jomart Toqaevqa UQShU Bas hatshysy laýazymyndaǵy josparyn tanystyrǵan bolatyn.
