Erlan Qoshanov TúrkPA jumysynyń basym baǵyttaryn atady

ASTANA. KAZINFORM – Túrki memleketterdiń Parlamenttik Assambleıasynyń plenarlyq otyrysynda Parlament Májilisiniń tóraǵasy Erlan Qoshanov baýyrlas elder arasyndaǵy parlamenttik dıplomatııanyń basym baǵyttaryn atady. 

– Amanat arqalaǵan depýtat retinde halyqtarymyzdyń nıeti men arman-muratyn jaqsy bilemiz. Árıne, eń áýelgi maqsatymyz – kóshbasshylarymyzǵa tirek bola otyryp, taǵdyrsheshti sheshimderdi zańnamalyq turǵyda qoldaý. Degenmen, Parlament zań qabyldaıtyn ınstıtýt qana emes. Ol – ulttarymyzdy uıystyratyn, elderimizdi jaqyndastyratyn, zańnamalarymyzdy úndestiretin altyn kópir. Bizdiń basty ári tarıhı mıssııamyz osy dep oılaımyn. Ásirese, qazirgi aýmaly-tókpeli zamanda parlamenttik dıalog pen dıplomatııaǵa zor jaýapkershilik júktelip otyr, - dedi E. Qoshanov. 

Májilis tóraǵasy sondaı-aq parlamenttik dıplomatııa arqyly birneshe baǵytta jumysty jandandyrýdy usyndy.

– Alda aýqymdy jumys kútip tur. Ekonomıka, saýda, bilim berý, ekologııa jáne basqa da salalardaǵy normalardy birizdendirýde uıymnyń rólin kúsheıtýge tıispiz. Parlamenttik dıplomatııa arqyly biz birneshe baǵytta jumysty jandandyrýymyz qajet dep sanaımyz, - dedi ol.

Ol baǵyttar:

– halyqaralyq parlamenttik uıymdarmen ózara yqpaldastyqty kúsheıtý;

– túrki elderiniń múddesin alǵa tartyp, basqa da forýmdarda ókildik etý;

– gýmanıtarlyq baılanysqa serpin berýjáne bárimizge ortaq túrki mádenı murasyn, dástúrler men tilderdi saqtaýǵa baǵyttalǵan bastamalardy ilgeriletý;

– tájirıbe almasý, tyń ıdeıalardy ortaǵa salý maqsatymen birlesken parlamenttik forýmdar ótkizý.

Buǵan deıin Qazaqstan, Ázerbaıjan, Qyrǵyzstan jáne Ózbekstan jáne Soltústik Kıpr Túrik Respýblıkasy parlamentteriniń spıkerleri Ulttyq ǵarysh ortalyǵyna baryp, ǵarysh apparattaryn qurastyrý-synaý kesheniniń jumysymen tanysqanyn jazǵan edik.