Erlan Qoshanov Tilderdi damytý basqarmasynyń jumysyn qatań synǵa aldy
Aımaq basshysy qazaq jáne aǵylshyn tilderin oqytý, is qaǵazdaryn memlekettik tilde júrgizý jumystaryn qajetti deńgeıde uıymdastyrmaı otyrǵan mekemeler men óńirlerge qatysty shara qoldanýdy tapsyrdy.
"2024 jylǵa qaraı is-qaǵazdar latyn grafıkasyna kóshiriledi. Sol kezeńge deıin biz ázir bolýymyz kerek. Osyǵan baılanysty barlyq óńirlerde birdeı oqytý jáne beıimdeý kýrstaryn ashýdy qolǵa alyńyzdar. Memlekettik mekemelerdiń qujat aınalymyn ishki baqylaý boıynsha arnaıy jumys toby qurylyp, ishki jáne shyǵys qujattarynyń memlekettik tilde daıyndalýy men rásimdelýi qatań baqylaýǵa alynsyn. Basqarma basshylary qala, aýdan ákimi apparattary men memlekettik mekemelerden qujattardyń orys tilindegi nusqasyn suraýdy toqtatsyn", - dedi Erlan Qoshanov Tilderdi damytý basqarmasynyń basshysy Gúlnáraıym Qańtarbekovaǵa qarata.
Tilderdi damytý basqarmasynyń basshysy Gúlnáraıym Qańtarbekovanyń aıtýynsha, oblystaǵy13 aýmaqta memlekettik tildi oqytý jumysy júrgizilip, 2 myń adam oqytylǵan. Alaıda bul derekter aımaq basshysynyń kóńilinen shyqpady.
"Oqytý jaǵyn men sizge aıtaıyn, biz alysqa ketken joqpyz. Men muny baqylap, tekserip kórdim. Oqytýda ádistemelik quraldaryńyz, negizgi metodıkalaryńyz - onyń bári syn kótermeıdi. Bul negizi bizdiń bolashaǵymyzǵa, ult bolashaǵyna, el bolashaǵyna qajet úlken másele! (...) Elbasy "qazaq qazaqpen qazaqsha sóılesin" dep aıtty, soǵan qandaı yqpal jasap jatyrsyzdar? Tipti naýqan qylý kerek, oqytý kerek, bul áriptesterimizdiń bolashaǵyna kerek", - dedi Erlan Qoshanov.
Sonymen qatar Erlan Qoshanov memlekettik basylymdarda qazaq tilinde shyǵatyn kontenttiń úlesin ulǵaıtý ákimderdiń mindeti ekenin aıtty: «Sondyqtan da josparly túrde kezeń-kezeńmen qazaq tildegi materıaldar kólemin arttyrý máselesin sheshý kerek».
Oblys ákiminiń dereginshe, memlekettik baǵdarlamada kórsetilgen «Memlekettik BAQ-taǵy qazaq tilindegi kontenttiń úlesi» nysanaly ındıkatoryna oblys boıynsha qol jetkizilgenimen, Shahtınsk, Balqash, Qaraǵandy, Jezqazǵan, Qarajal, Prıozersk, Sátbaev qalalary men Osakarovka jáne Nura aýdandary josparlanǵan ındıkator áli joq.
Sóz sońynda aımaq basshysy joǵaryda atalǵan máselelerge qatysty Tilderdi damytý basqarmasynyń basshysy men óz orynbasary Jandos Aqylserikulyna birqatar tapsyrmalar berdi.
"Til saıasatyn júzege asyrý salasynda aldymyzda aýqymdy máseleler tur. Ony júzege asyrýǵa barlyǵymyz birdeı atsalysýymyz qajet. Bul baǵyttaǵy jumystardy úılestirý Tilderdi damytý basqarmasyna júkteledi. Jandos Aqylserikuly, sizge osy baǵyttaǵy jumystardy tikeleı baqylaýǵa alýdy tapsyramyn",- dedi Erlan Qoshanov.
