Erlan Qoshanov stýdentterge ákim úshin baqyttyń ne ekenin aıtty
ASTANA. QazAqparat - Qaraǵandy oblysynyń ákimi Erlan Qoshanov «Jastar dástúrli qundylyqtar úshin» forýmynyń qatysýshylarymen kezdesti, dep habarlaıdy óńir basshysynyń resmı saıty .
Jastardyń suraqtaryna jaýap bere kele, aımaq basshysy ózi týraly, ol úshin baqyt degen ne ekenin jáne de Qaraǵandyda jańa balalar men jasóspirimder saraıy qashan paıda bolatynyn aıtty.
- Osyndaı kezdesýlerge qýana kelemin, ásirese jastar aýdıtorııasyna. Munda eń shynaıy ári tikeleı baılanys ornaıdy. Qaraǵandy oblysy - elimizdiń eń jas jáne ýrbanızatsııalanǵan aımaǵy,-dedi Erlan Qoshanov forýmnyń ashylýynda.
Sharanyń basty maqsaty jastar boıynda dástúrli qundylyqtardy, qazaqstandyq patrıotızmniń jańasha ustanymdaryn jáne de halqymyzǵa tán dinı sana-sezimdi qalyptastyrý, sondaı-aq pragmatızm men krıtıkalyq oılaý daǵdylarymen baılanysty suraqtardy talqylaý boldy.
Forýmǵa qatysýshylarmen kezdesýge QR Din isteri jáne azamattyq qoǵam mınıstrliginiń vıtse-mınıstri Abzal Núkenov, tuńǵysh ǵaryshker Toqtar Áýbákirov, «Nur-Múbárák» ıslam mádenıeti ýnıversıtetiniń rektory Jýda Basıýnı jáne Qazaqstan MMA federatsııasynyń prezıdenti Anatolıı Kım keldi.
Jastar spıkerlerge ózderin qyzyqtyrǵan suraqtardy qoıdy. Mysalǵa Erbolat esimdi stýdent ákimnen siz úshin baqyt degen ne dep surady?
- Siz qandaı baqytty aıtasyz - ákimniń baqyty ma, álde jeke me?-dep kúldi Erlan Qoshanov. -Eger ákimniń baqyty jaıly aıtar bolsam, onda ol aımaq turǵyndarynyń baqyty der edim. Aımaqta kómir, jylý, sý bar bolsa, qoǵamdyq kólik ýaqtyly júrip-tursa - men úshin bul úlken baqyt bolar edi. Jáne de, bastysy turǵyndar maǵan uryspasa. Al jeke baqytqa keler bolsaq, ol - meniń otbasym. Qyzdarymnyń baqyty, otbasymnyń baqyty - men úshin mańyzdysy osy.
Jastardy qyzyqtyrǵan taǵy bir saýal ol Qaraǵandyda Jastar saraıynyń qurylysy. Oblys ákiminiń sózinshe, ol josparda bar.
- Qalamyzǵa kóptegen nárseler qajet. Bizge úlken kontsert zaly, úlken monsha jáne shyǵarmashylyq úı qajet. Munyń barlyǵy josparda bar, alaıda olardy iske asyrý úshin ýaqyt kerek. Kelesi jyldan bastap biz eki nysan qurylysyn qolǵa alamyz. Olar 1250 oryndyq úlken kontsert zaly men Balalar men jasóspirimder saraıy, onda qaladaǵy eń úlken 50 metrlik basseın bolady.
Al Darıa esimdi qyz ákimnen Qaraǵandy aımaǵy týraly alǵashqy kózqarasy týraly surady.
- Kózqarasym jaqsy, biraq ony alǵashqy dep aıtýǵa kelmes. Men óz týǵan jerime jumys isteýge keldim. Buǵan deıin de men apta saıyn Qaraǵandyda bolatynmyn. Men osynda, Qaraǵandy oblysynda týyp, óstim, kóp jyldar boıy Jezqazǵanda jumys istedim. Sol sebepti muny alǵashqy kózqaras dep ataýǵa kelmeıtin shyǵar, sebebi men óz úıime keldim,-dep jaýap berdi Erlan Qoshanov.
Jastar forýmy Qaraǵandyda osymen ekinshi ret ótkizilip otyr. Bıyl forým aıasynda semınar-trenıngter, Qaraǵandy qalasynyń joǵary oqý oryndarynyń stýdentterimen spıkerlerdiń kezdesýi, oblystyq ólketaný mýzeıine ekskýrsııa, oblys ákimi kýbogi úshin Jaıdarman festıvali, Qazdaýysty Qazybek bıdiń qyzmeti men shyǵarmashylyǵy arnalǵan ǵylymı-praktıkalyq konferentsııa, «Qazybek bı» spektakliniń kórsetilimi, «TEDx QARAGHANDY» klýbynyń ashylýy ótedi.
Qaraǵandy oblysynda árbir tórtinshi turǵyny - ol 14 pen 29 jas aralyǵyndaǵy jastar. Jáne de jastardyń 80 paıyzǵa jýyǵy qalalarda turady.
