Erlan Qoshanov «Shubarkól kómir» kompanııasynyń jumysshylarymen kezdesti
QARAǴANDY. QazAqparat - Qaraǵandy oblysynyń ákimi Erlan Qoshanov «Shubarkól kómir» AQ jumysshylarymen kezdesti, dep habarlaıdy QazAqparat tilshisi.
Óńir basshysy taý-ken jumystaryn júrgizetin «ortalyq» kómir razrezinde boldy. Ol osy jyly kásiporynǵa kelip túsken óndiristik alań men jańa tehnıkany qarap shyqty.
Qyzmetkerler sońǵy jyldary jabdyqtar jańartylyp, óndiris kólemi ósip jatqanyn atap ótti. Biraq jumysshylardy birinshi kezekte - eńbekke aqy tóleýge qatysty máseleni surady. Kásiporyn basshylyǵy 1 qańtardan bastap qosalqy personal úshin jalaqyny kóbeıtý máselesi qaralatynyn habarlady. Qazir olardyń eńbekaqysy negizgi qyzmetkerlerge qaraǵanda azyraq.
«Bizdiń, ıaǵnı jergilikti atqarýshy bıliktiń jumysy - sizderdiń ál-aýqattaryńyz ben ómir súrý jaǵdaılaryńyz laıyqty deńgeıde bolýyn qamtamasyz etý. Biz oblystyń kásiporyndaryndaǵy eńbekaqy deńgeıin únemi qadaǵalaımyz. Ásirese óndiristiń qaýipsizdigi jiti baqylaýda. Sizderdiń densaýlyqtaryńyz ben ómirlerińiz - eń qymbat. Sondyqtan árbir qyzmetker qaýipsizdik tehnıkasyna qatysty qoıylatyn talaptar eshqashan artyq bolmaıtynyn túsinýleri kerek. Bul sizder úshin mańyzdy», - dedi Erlan Qoshanov.
Kezdesýden keıin oblys ákimi salynyp jatqan 120 oryndyq vahtalyq jumsyshylarǵa arnalǵan jataqhanany aralap kórdi. Bólmeler turmystyq tehnıkamen jabdyqtalady. Qurylys aıaqtalýǵa jaqyn. Sonymen qatar, munda trenajerlary bar sport kesheni men eki fýtbol alańy salynýda.
