Erlan Qoshanov sheshimin tapqan ózekti máselelerge qatysty pikir bildirdi

ASTANA. KAZINFORM — Májilis tóraǵasy Erlan Qoshanov keıingi kezde sheshimin tapqan kúrdeli máselelerge túsinik berdi.

- Óńirlerge saparymyz kezinde eń jıi kóterilgen máseleniń biri – zııandy óndiriste jumys isteıtin adamdardyń jaǵdaıy edi. Bul jyldar boıy aıtylyp keldi. Byltyr sol túıtkil sheshimin tapty. Olarǵa qosymsha áleýmettik tólem tóleý máselesin zańmen bekittik. Bul shahtada, karerlerde, metallýrgııalyq tsehtarda zııandy ári qaýipti jumys istep júrgen júz myńdaǵan jumysshyny qamtydy. Depýtattar aýyl-aımaqty aralaǵanda balalardyń quyqyǵyn qorǵaý máselesi jıi kóterildi. Ásirese, balabaqshalarǵa talaptardy kúsheıtý kerek degen ótinishter aıtyldy. Soǵan baılanysty depýtattar Úkimetpen birge tyǵyz jumys istep, balabaqshalarǵa lıtsenzııa berý tártibi qaıtaryldy. Taıaý kúnderi ǵana biz osy másele boıynsha tıisti zańdy qabyldadyq, - dedi E. Qoshanov Májilistiń jalpy otyrysynda.

Onyń aıtýynsha, óńirlerde daryndy balalardy jáne halyqaralyq ǵylymı jarystardyń jeńimpazdaryn qoldaý máselesin de saılaýshylar únemi kóterip júr.

- Bul da sheshildi. Endi jetistikke jetken jas jetkinshekter Qazaqstannyń kez kelgen oqý ornyna UBT tapsyrmaı-aq túse alady. Oǵan qosa, 6 mln teńgege deıin bir rettik tólem beriledi. Olardy daıyndaǵan tálimgerlerdi, muǵalimderdi de yntaladyrý qarastyrylyp otyr. Jurtshylyqty alańdatqan taǵy bir ózekti másele – aýyldardaǵy dáriger tapshylyǵy bolatyn. «AMANAT» partııasy bul máseleni Saılaýaldy baǵdarlamasyna engizgenin bilesizder. Sóıtip, arnaıy zań qabyldandy.

Sol zań boıynsha aýylǵa jumys isteýge baratyn medıtsına qyzmetkerleri úshin 9 mln teńgege deıin tólem belgilendi. Qazir myńdaǵan dáriger aýylǵa baryp, osynyń ıgiligin kórip otyr. Sondaı-aq turǵyndar onkologııalyq aýrýlarǵa skrınıngtiń qoljetimdiligine baılanysty másele kóterdi. Jalpy, aýrýdy erte kezeńde anyqtaý – úlken problema. Osy máseleni de zańmen rettedik. Endi onkologııalyq aýrýlarǵa tegin skrınıng júrgiziledi. Ol 3,5 mln azamatty qamtyp, onkologııalyq aýrýlardy erte kezeńde anyqtaýǵa múmkindik beredi. Bul – myńdaǵan adamnyń ómirin saqtap qalý degen sóz, - dedi Májilis tóraǵasy.

Aımaqtardy aralaý kezinde azamattar áleýmettik ınfraqurylymnyń jetkiliksizdigine qatysty da másele kóterdi. Bul – ásirese, úlken qalalarǵa tán problema. Kópqabatty úıler jappaı salynyp jatyr. Al mektep, aýrýhana tapshylyǵy sol kúıi sheshilmeı otyr. Osy olqylyqtyń ornyn toltyrý úshin depýtattar Úkimetpen birlesip, zańǵa ózgeris engizdi. Osylaısha, áleýmettik ınfraqurylymy joq jerlerge kópqabatty úılerdi salýǵa tyıym salyndy.

Budan bólek, Parlament estý qabileti nashar balalardy qoldaý boıynsha da arnaıy norma engizdi. Endi mundaı jandar estý qurylǵylarymen tegin qamtamasyz etiledi. Bul qadam myńdaǵan balany múgedektikke jetkizbeı, ońaltýǵa múmkindik berdi.

- Men tek birneshe máselege ǵana toqtaldym. Endigi kezekte, Úkimetpen birlesip, osy jumysty ári qaraı jalǵastyrýymyz kerek. Tek osyndaı otyrystarda ǵana emes, depýtattar men Úkimet músheleri kúndelikti baılanysta bolýy qajet dep oılaımyn. Azamattardyń talap-tilegin oryndaýǵa erekshe kóńil bólýge tıis. Jumys shash etekten. Máselen, monoqalalardy damytý jaıy da nazardan qalyp qoımaýy kerek. Jergilikti mańyzy bar joldar, medıtsınalyq saqtandyrylym, jumyspen qamtý, baǵa ósimi, kıberalaıaqtyq, baspana qoljetimdiligi, ınternettiń sapasy, taǵy da sol sııaqty máseleler bar. Memlekettik organdar olardy dereý sheshý qajet, shara qoldaný kerek, - dedi Erlan Qoshanov.

Budan buryn habarlanǵandaı, endi MÁMS-pen qamtylmaǵandar aqysyz onkologııalyq skrınıngten óte alady.