Erlan Qoshanov Sátbaevtaǵy ekologııalyq máselelerdiń basty sebebin atady
ASTANA. KAZINFORM — Májilis tóraǵasy Erlan Qoshanov pen bir top depýtat Ulytaý oblysyna jumys sapary aıasynda Jezqazǵan jáne Sátbaev qalalarynyń turǵyndarymen kezdesý ótkizdi.
Sapar aıasynda Erlan Qoshanov Sátbaev qalasyndaǵy №1 jylý stansasynyń jumysymen tanysyp, eńbek ujymymen jáne qala jurtshylyǵymen kezdesip, olarmen ekologııa jáne «qara qar» máselelerin talqylady.
Májilis spıkeri atap ótkendeı, Sátbaevtaǵy ekologııalyq máselelerdiń basty sebebi – kómir sapasy men jylý elektr stantsııasyndaǵy fıltrlerdiń nashar jumys isteýi. Sondaı-aq ol Memleket basshysynyń bul jaǵdaıdan habardar ekenin jáne qalanyń ekologııasyn lastaýdyń júıeli sebepterin joıý úshin keshendi tekserý júrgizýdi tapsyrǵanyn atap ótti.
Erlan Qoshanov oblys ákimdigi men «Qazaqmys» kompanııasynyń ókilderine jaǵdaıdy jaqsartý jáne ekologııalyq máselelerdi, sonyń ishinde Sátbaevtaǵy jylý elektr stantsııasyn gazǵa kóshirý boıynsha keshendi sharalardy shuǵyl túrde qabyldaý týraly talap qoıdy.
– Eski fıltrler sapasyz kómirden shyqqan kúl qaldyqtaryn ustap turýǵa shamasy jetpeı otyr. Bul qala ekologııasyna jáne turǵyndardyń densaýlyǵyna keri áser etýde. Mundaı máseleni qysqa merzimde sheshý múmkin emes ekeni túsinikti. Biraq qazir barlyq sebepti tolyq anyqtap, kelesi jylytý maýsymyna deıin naqty sharalar qabyldaýymyz qajet. Kásiporyn basshylyǵy, Energetıka mınıstrligi jáne ákimdik bul máseleni birlesip, ýaqyt sozdyrmaı sheshýge tıis. «Qara qar» sııaqty keleńsiz qubylystardan túbegeıli arylýǵa bar kúshimizdi salýymyz qajet. Óz kezeginde, Májilis depýtattary jaǵdaıdy baqylaýda ustaıtyn bolady, – dedi Májilis tóraǵasy.
Kezdesý qorytyndysy boıynsha oblys ákimdigi men «Qazaqmys» kompanııasynyń basshylyǵy kelesi jylytý maýsymyna deıin Sátbaev jylý stantsııasynyń tazartý júıelerin jańǵyrtý boıynsha barlyq josparlanǵan jumysty aıaqtaýǵa mindetteme aldy. Іs-sharaǵa qatysqan Energetıka mınıstrliginiń ókilderi Ulytaý oblysynda jylý elektr stantsııasyn jańǵyrtýda «ınvestıtsııa ornyna tarıf»» tásili arqyly qoldaý kórsetýge daıyn ekenin habarlady.
Sondaı-aq Májilis spıkeri halyqty jylýmen úzdiksiz qamtamasyz etý sońǵy jyldardaǵy eń mańyzdy máseleniń biri ekenine nazar aýdardy. Injenerlik ınfraqurylymnyń jaǵdaıy Memleket basshysynyń udaıy baqylaýynda. Eldegi tozyǵy jetken qazandyqtardy, ınjenerlik-kommýnaldyq jelilerdi jappaı jańǵyrtý jumystary esh pafossyz jáne kózboıaýshylyqsyz júrip jatyr. Ol týraly Qasym-Jomart Toqaev jaqynda «Ana tili» gazetine bergen suhbatynda aıtty.
Májilis depýtattary Jezqazǵan qalasyndaǵy gıdrotsehtaǵy jumys barysymen de tanysty. Erlan Qoshanov atap ótkendeı, Jezqazǵandy aýyz sýmen qamtamasyz etý áli kúnge deıin eń ózekti máseleniń biri bolyp otyr. 2021 jyly Memleket basshysy bul túıtkildi sheshýdi tapsyrǵan bolatyn. Qazirgi ýaqytqa deıin birqatar sharýa atqarylǵanymen, áli de kóptegen másele bar.
– Jezqazǵan turǵyndary sapaly aýyz sýǵa múmkindiginshe tezirek qol jetkizýi kerek. Ol halyqtyń densaýlyǵy men óńirdegi ahýalǵa tikeleı áser etedi. Bul – barlyq taraptardyń, mınıstrlikter men ákimdiktiń ortaq mindeti. Óz kezeginde depýtattar da osy jumysqa belsene atsalysýǵa daıyn, – dedi Erlan Qoshanov.
Palata spıkeri Jezqazǵandy aýyz sýmen qamtamasyz etý máselesin jer asty sý kózderin paıdalaný arqyly eki sý qubyry – Esqula jáne Úıtas-Aıdos sý júıeleri esebinen sheshý josparlanyp otyrǵanyn atap ótti. Búgingi tańda qajetti jobalyq qujattardyń bári ázirlenip, naqty jumys kólemi belgilengen, bastapqy qarjy bólingen.
Basqosý barysynda Sý resýrstary jáne ırrıgatsııa mınıstrligi men oblys basshylyǵy ókilderiniń qatysýymen barlyq másele jan-jaqty talqylandy. Kezdesý qorytyndysy boıynsha Májilis tóraǵasy 2025 jyly barlyq máseleni sheshýge jáne Jezqazǵandy aýyz sýmen qamtamasyz etýge baǵyttalǵan naqty qadamdar jasalýǵa tıis ekenin basa aıtty.
Sapar barysynda depýtattar Sátbaev qalasyndaǵy Oqýshylar saraıynyń jumysymen tanysyp, Jezqazǵanda salynyp jatqan dene shynyqtyrý-saýyqtyrý kesheninde oblys belsendilerimen, sondaı-aq Jezqazǵan jurtshylyǵymen kezdesti.
Eske sala keteıik, buǵan deıin Sátbaev qalasy tútin men kúıeniń astynda qalǵanyn jazǵan edik.