Erlan Qoshanov Prezıdenttiń Qaraǵandy oblysyna jasaǵan sapary boıynsha tapsyrma berdi
QARAǴANDY. QazAqparat - Qaraǵandy oblysynyń ákimi Erlan Qoshanov apparattyq jınalysta Prezıdent Qasym-Jomart Toqaevtyń óńirimizge jasaǵan jumys saparynyń qorytyndysy boıynsha birqatar tapsyrmalar berdi, dep habarlaıdy QazAqparat óńir basshysynyń resmı saıtyna silteme jasap.
Tapsyrmalar oblystyń ındýstrııalyq-ınnovatsııalyq jáne áleýmettik damýyna qatysty boldy. «Saryarqa» EEA-na sapar barysynda Memleket basshysy óńdeýshi ónerkásip kólemin arttyrý jáne eksporttaýshylarǵa servıstik qoldaý kórsetý qajettigin atap ótti.
- Bizge qarapaıym zattar ekonomıkasy salasynda jumysty jalǵastyrý kerek. Bul qazirgi tańda erekshe nazardy talap etetin basym baǵyt. Jobalyq keńseniń jumysyn kúsheıtýdi, maquldanǵan jobalardyń sanyn arttyrýdy tapsyramyn. Jańa jobalardy izdeńizder jáne óńdeńizder. Ár kásipkermen jeke jumys isteý kerek. Memleket basshysy bizdiń strategııalyq áriptesimiz – Germanııa ekenin atap ótti. Bizde nemis ınvestorlary bar. Solarmen jumys isteńizder, - dep tapsyrdy Erlan Qoshanov.
Aımaq basshysy Qaraǵandy oblysy óńirlik básekelestiktegi kóshbasshylardyń biri bolýy tıis ekenin atap ótti.
Qasym-Jomart Toqaev Qaraǵandyda salynyp jatqan «Alfarýh» kóterme-logıstıkalyq ortalyǵynda bolyp qaıtty. Nysannyń ashylýy óńirdegi azyq-túlik taýarlarynyń qunyn tasymaldaýǵa jumsalatyn shyǵyndardy qysqartý esebinen azaıtýǵa múmkindik beredi. Memleket basshysy jobanyń mańyzdylyǵy men ózektiligin baǵalady.
- Belsendi jáne sapaly marketıngtik jumys júrgizýdi óndirýshilerge bizdiń ortalyq týraly aıtýdy tapsyramyn. Qajet bolsa, olardy osynda shaqyryńyzdar, tusaýkeserler ótkizińizder.
Jınalysta oblys ákimi sondaı-aq mindetti medıtsınalyq saqtandyrý júıesine kóshýge daıyndyqty kúsheıtý qajettigin atap ótti. Qaraǵandy oblysynda atalmysh júıe birinshi qyrkúıekten bastap pılottyq rejimde engiziledi.
Sondaı-aq Erlan Qoshanov osy jyldyń birinshi jeltoqsanyna deıin Qaraǵandynyń jańa ortalyǵyn damytýdyń tolyq strategııasyn pysyqtap, usynýdy tapsyrdy.
