Erlan Qoshanov: Prezıdent «Memleket qulamaıdy» degen bir sózimen halyqqa rýh berdi
«Búgin Májilis qabyrǵasynda osymen ekinshi ret Bas prokýror men quqyq qorǵaý organdarynyń basshylaryn tyńdadyq. Eń basty aıtar keterligi – bul Parlamenttegi tyńdaý tikeleı efırde ótip jatyr. Bul memlekettiń, bıliktiń ashyqtyǵyn jáne osy aýyr máseleni egjeı-tegjeıli anyqtaýǵa erekshe múddeli ekenin kórsetedi. Halqymyzdan jasyratyn eshteńe joq, soǵan qoǵam da shyndyqqa kóz jetkizý kerek dep sanaımyz», - dedi palata tóraǵasy.
Onyń aıtýynsha, qańtar oqıǵasynyń naqty josparlanǵan aýyr qylmys ekenin dáleldeıtin faktiler jetkilikti, búgin aıtyldy. Bul jaıttar Bas prokýrordyń baıandamasynda da tolyq qamtyldy. Bir sózben aıtqanda, búgingi kúni qańtardaǵy qaıǵyly oqıǵalardyń negizgi sebep-saldary belgili deýge bolady.
«Qańtardy uıymdastyrýshylardyń kózdegeni – qantógispen bolsyn, qandaı da jolmen bılikti basyp alý edi. Májiliste kórsetilgen aıǵaqtar men qarý-jaraqtar kórmesi búlikti uıymdastyrǵan toptyń osy pıǵylyn anyq dáleldeıdi. Olar óz degenderin júzege asyrý úshin beıbit halyqty qalqan etti, ańǵal jastardy adastyrýǵa tyrysty. Bul ashyǵyn aıtqanda Táýelsizdikke jasalǵan qastandyq bolatyn. Biraq halqymyzdyń aqyl-parasaty men birliginiń arqasynda, Prezıdentimizdiń erik-jigeriniń arqasynda memlekettigimizdi saqtap qaldyq», - dedi E. Qoshanov.
Sonymen birge, E.Qoshanov búlikshilerdiń basty maqsaty – halyqty úıreılendirip, qoǵamdy alasapyran qylyp, Prezıdentti qyzmetinen ketýge májbúrleý bolǵanyn aıtty.
«Men Memleket basshysynyń osyndaı qıyn jaǵdaıda moınyna aýyr jaýapkershilik alyp, batyl sheshimder qabyldaǵanyna kýá boldym. Ol týraly aıtylyp ta, jazylyp ta júr. Sonyń barlyǵy shyndyq. Osyndaı syn-saǵatta Q. Kemeluly «Memleket qulamaıdy» degen bir aýyz sózimen halyqqa rýh berip, úndeý jarııalady. Memleketti buryn-sońdy bolmaǵan qıyndyqtan alyp shyqty. Eń bastysy, eldiń týy jyǵylǵan joq. Keshegi jalpyulttyq referendýmda, Prezıdent saılaýynda halyqtyń Qasym-Jomart Toqaevty jappaı qoldaýy, zor senimi osynyń shynaıy kórinisi, dáleli dep sanaımyn», - dedi Májilis tóraǵasy.
Aıta keteıik, búgin QR Bas prokýrory Berik Asylov Májiliste qańtar oqıǵasyna qatysty depýtattar saýalyna jaýap berdi.
Foto: parlam.kz
