Erlan Qoshanov Ózbekstan Olıı Majlısiniń spıkerimen kezdesti

NUR-SULTAN. QazAqparat - Búgin Májilis Tóraǵasy Erlan Qoshanov pen Qazaqstanǵa resmı saparmen kelgen Ózbekstannyń Olıı Majlıs Zań shyǵarý palatasynyń Spıkeri Nýrdınjon Ismoılov Parlamentaralyq yntymaqtastyq keńesin qurý týraly Kelisimge qol qoıdy. Bul týraly QazAqparat Májilistiń baspasóz qyzmetine silteme jasap habarlaıdy.

Kezdesý barysynda Erlan Qoshanov Qazaqstan men Ózbekstan Prezıdentteri Qasym-Jomart Toqaev pen Shavkat Mıromonovıch Mırzıeevtiń kóregen, salıqaly saıasatynyń, sonymen birge, dostyq peıilderiniń arqasynda búginde eki el arasyndaǵy yntymaqtastyq óte joǵary deńgeıge kóterilgenin, sonyń nátıjesinde zań shyǵarý organdary arasyndaǵy áriptestik te jyl saıyn nyǵaıyp kele jatqanyn atap ótti.

Oǵan dálel retinde Májilis Tóraǵasy jaqynda Ózbekstan Prezıdentiniń bizdiń elimizge sapary barysynda qos el Prezıdentteriniń parlamentaralyq yntymaqtastyq týraly keńesti qurý kelisimine qol jetkizgenin, onyń tarıhı mańyzyn alǵa tarta kelip, bizdiń elderimiz táýelsizdik alǵan kúnnen bastap, bir-birine qoldaý kórsetip, qos memlekettiń órkenıeti jolynda berik, úılesimdi, syndarly qarym-qatynas ornaǵanyn aıtty. Jańa qurylǵan Keńes bizdiń memleketterimizdiń yqpaldastyǵyna tyń serpin beretinin, qol jetken tabystarymyzdy odan ary tereńdetip, Prezıdentterimizdiń barlyq sala boıynsha kelisimderin tıimdi júzege asyrýǵa, zańnamalyq yntymaqtastyqty kúsheıtýge jańa jol ashatynyn atap ótti.

Óz kezeginde mártebeli meıman bul kelisim arqyly eki eldiń, sonyń ishinde, parlamenttar arasyndaǵy yntymaqtastyqty damytýdyń jańa kezeńi bastalǵanyn, zań shyǵarýshy organdar memleket basshylarynyń kelisimderin júzege asyrý úshin bar kúsh-jigerlerin arnaıtynyn jetkizdi.

Bıyl qos memleket arasynda dıplomatııalyq qatynastyń ornaǵanyna týra 30 jyl tolady. Búginde Ózbekstan Qazaqstannyń iri ekonomıkalyq áriptesi sanalady. Qazaqstanda ózbek kapıtalynyń qatysýymen myńnan astam birlesken kásiporyn jumys isteıdi.

Sondaı-aq kólik-logıstıka, qurylys, tranzıt jáne týrızm basqa da salalarda áriptestik áleýeti joǵary.

Kezdesý barysynda Erlan Qoshanov Qazaqstan Prezıdentiniń atynan Nýrdınjon Ismoılovqa baýyrlas halyqtar arasyndaǵy yntymaqtastyq pen dostyqty nyǵaıtýǵa qosqan zor úlesi úshin II «Dostyq» ordenin tabys etti.