Erlan Qoshanov óńirdegi shaǵyn nesıeleý baǵdarlamasy boıynsha jumystardy synǵa aldy
ASTANA. QazAqparat - Qaraǵandy oblysynyń ákimi «Nátıjeli jumyspen qamtý jáne jappaı kásipkerlikti damytý» baǵdarlamasyn júzege asyrýǵa kóńili tolmaıtynyn jetkizdi. Bul týraly Qaraǵandy oblysy ákimdiginiń saıty habarlaıdy.
Erlan Qoshanov apparattyq jınalysta qala jáne aýdan ákimderine osy baǵdarlama aıasynda jumyssyzdardy jumyldyrý belsendiliginiń tómendigine qatysty sógis aıtty.
«Shaǵyn nesıe berý úshin qalalarda 2017 jyly 1 mlrd teńgeden astam qarajat bólingen. Bul baǵyt oblys ortalyǵyn jáne 8 shaǵyn qalalardy - Abaı, Balqash, Jezqazǵan, Qarajal, Saran, Sátpaev, Temirtaý, Shahtınskini qamtıdy. Shaǵyn nesıeniń maksımaldy somasy 18 mln teńge, syıaqy mólsheri jylyna - 6%. Investıtsııalyq zaım úshin nesıeleý merzimi - 5 jyldy, aınalym qarajatyn ulǵaıtý úshin nesıeleý - 3 jyldy quraıdy», - dep málimdedi oblystyq kásipkerlik basqarmasynyń jetekshisi Tatıana Ablaeva.
«Damý» qory jumys istep turǵan bızneske nesıe somasynan 50%-ǵa deıin jáne kásibin endi bastaǵan kásipkerler úshin 85%-ǵa deıin kepildik beredi.
«Sáýirde 273,6 mln. teńge baǵdarlamanyń qarjylyq operatory «Damý» qoryna aýdaryldy. Jyldyq somanyń 28% ıgerildi», - deıdi Tatıana Ablaeva. Aýylsharýashylyq basqarmasynyń málimdeýinshe aýyldaǵy kásipkerlik bastamalarǵa shaǵyn nesıe berý úshin aımaqqa 2017 jyly 3,5 mlrd teńge bólingen.
Oblys ákimi sonymen qatar memlekettik qoldaý sharalary týraly aqparatty taratý jáne túsindirý jumystaryn da qatań synǵa aldy. «Men aýyl-aımaqtardy aralaǵan kezde menen qandaı baǵdarlamalar bar, olardyń stavkalary qandaı dep surap jatady. Aýyl adamdary bul baǵdarlamalar týraly eshteńe bilmeıdi. Menińshe, qala jáne aýdan, eldi mekenderdiń ákimderi ózderi de ol týraly habarsyz», - degen boljam aıtty Erlan Qoshanov.
Apparattyq jınalysta shaǵyn nesıe berý qarajatyn ıgerýge qatysty qaýip jaıly da áńgime qozǵaldy. Shaǵyn qalalarda bul baǵdarlamaǵa qatysýshylardy tartý jumystaryn belsendirek etý máselesi talqylandy.
«Memlekettik baǵdarlamalardyń, onyń ishinde «Nátıjeli jumyspen qamtý jáne jappaı kásipkerlikti damytý» baǵdarlamasynyń da eń basty maqsaty - salalardy damytý jáne jumyssyzdyq máselesin sheshý bolyp tabylady. Bizdiń oblysymyz jyl saıyn aýyz toltyryp aıtarlyqtaı kómek alady memleketten, - dedi aımaq basshysy. - Ótken jyly kásipkerlik pen aýyl sharýashylyǵyna bıýdjettik qarajattan 21 mlrd teńgeden astam qarjy bólindi. Sonyń arqasynda jumyssyzdyqtyń tómendeýin baqylaýdyń ornyna, onyń 4,9%-dan 5%-ǵa óskenin kórip otyrmyz».
Oblys ákimi ekonomıka jáne qarjy basqarmasyna bir apta kóleminde memlkettik qoldaýdyń tıimdiligi jaıly tolyq aqparat daıyndaýyn tapsyrdy. Salyq, óndiris kólemi, jumys oryndary boıynsha qaıtarym qandaı ekenin jan-jaqty zertteý kerek.
Aımaq basshysy mysal retinde Buqar Jyraý aýdanyn keltirdi. Onda 2016 jyly sýbsıdııalarǵa jumsalǵan qarajat 2,6 mlrd teńgeni quraǵan, KazAgro arqyly 750 mln. teńge kóleminde nesıe berilgen. Jalpy ónim kólemi nebary 1,9%-ǵa ǵana ósken, al mal sharýashylyǵy ónimi tómendep qalǵan. Nura aýdanynda memlekettik qoldaýǵa 2,6 mlrd. teńge jumsalaǵanymen 2016 jyly jumyssyzdyq kórsetkishi 3,8%-dan 4,5%-ǵa ósip ketken.
«Bul memleket qarjysy, sondyqtan árbir tıyn paıda alyp kelýi tıis. Sýbsıdııalar aýaǵa ushyp ketýine, al bıznestiń baıaý jyljýyna jol berilmeý kerek. Jumyspen qamtý máselesi - ákimderdiń jumysyn kórsetetin basty kórsetkish», - dedi Erlan Qoshanov.
