Erlan Qoshanov múgedekterdiń jaǵdaıyn jasaýda pandýstarmen shektelmeýge shaqyrdy
ASTANA. QazAqparat - Qaraǵandy oblysynyń ákimi Erlan Qoshanov múmkindigi shekteýli jandardyń jaǵdaıyn pandýstarmen shektelmeı, júıeli túrde jaqsartýdy talap etti. Aımaq basshysy bul jumystardy ózi qadaǵalaıtyn bolady. Bul týraly ol múgedekterdi áleýmettik qorǵaý salasy boıynsha ótken úılestirý keńesinde aıtty, dep habarlaıdy QazAqparat.
Qaraǵandy oblysy ákimdiginiń baspasóz qyzmetinen málim etkendeı, aımaqta 60 myńnan astam múmkindigi shekteýli jan turady, bul aımaq turǵyndarynyń jalpy sanynyń 4,4 %-y. Múgedek balalar sany 4 myńnan asady.
Qazirgi tańda múmkindigi shekteýli jandardyń ómir sapasyn jaqsartý jáne quqyqtaryn qamtamasyz etý boıynsha aımaqtyq sharalar jospary júzege asyrylýda. 2017 jyly oblystyq bıýdjetten múgedekterge áleýmettik qoldaý kórsetýge 631,9 mln teńge bólindi. Ótken jylmen salystyrǵanda qarjy somasy eki esege ulǵaıdy. Atalmysh qarajat múgedekter arbasyn, sýrdotehnıkalyq jáne tıflotehnıkalyq quraldardy satyp alýǵa, protezdeý boıynsha medıtsınalyq qyzmetterdi jáne protezdi-ortopedııalyq ónimderdi satyp alýǵa, múgedekter úshin sanatorlyq-kýrorttyq joldamalardy satyp alýǵa jumsalady.
Buǵan qosa múgedekterdi áleýmettik qorǵaýǵa baılanysty respýblıkalyq bıýdjetten 610,6 mln. teńge kóleminde maqsatty transfertter qarastyrylǵan.
Úılestirý keńesinde múgedekter úshin qoljetimdi ortanyń jaǵdaıy talqylandy. Jınalys barysynda birqatar basqarmalardyń jetekshileri, Qaraǵandy qalasy men Buqar Jyraý aýdanynyń ákimderi baıandama jasady.
Qaraǵandyda múmkindigi shekteýli jandardyń yńǵaıy úshin jolaýshylar tasymaldaıtyn 21 avtobýs arnaıy jabdyqtalǵan. Múgedekterdi tegin tasymaldaıtyn 33 ınvataksı jumys isteıdi.
Degenmen, múgedekter qoǵamdyq qorlarynyń ókilderi ınfraqurylymnyń joqtyǵyn aıtyp, shaǵymdandy.
«Eń basty problema - qoljetimdi qorshaǵan orta qurý. Qaıta qalpyna keltirý tehnıkalyq jabdyqtarymen bizdi qamtamasyz etedi. Qaraǵandylyqtar úshin satyp alynatyn múgedekter arbasyna, tipti Astanada da qyzyǵady. Alaıda biz qala ishinde júrip-turýymyz kerek qoı. Biz pandýstar týraly aıtyp otyrmyz. Sonymen qatar qulaǵy nashar estıtin, kózi nashar kóretin múgedekter de bar. Olar úshin nysandar beıimdelmegen», - deıdi «Laıyqty ómir» múgedekterdi qaıta qalpyna keltirý ortalyǵy» QQ tóraǵasy Aleksandr Ivkın.
Jınalys barysynda sondaı-aq qala joldary arbada otyrǵan múgedekter úshin beıimdelmegeni týraly sóz qozǵaldy. Al temirjol vokzalynda kótergish quraldar joq. Sonymen qatar polıtsııa qyzmetkerleri múgedekterge arnalǵan kólik qoıý oryndaryna basqalar kólikterin qoımaýyn qatańyraq qadaǵalasa eken degen taǵy bir ótinishi aıtyldy. Qaraǵandy qalasyndaǵy 90 myń adamǵa qyzmet kórsetetin emhanada múgedekterdi joǵary qabattarǵa kóteretin qurylǵylar joq.
Sonymen birge jınalys barysynda ınklıýzıvti bilim máselesi de talqylandy.
Ákimdikten habarlaǵandaı, Erlan Qoshanov Jumyspen qamtý jáne áleýmettik baǵdarlamalar basqarmasynyń esebin qanaǵattanarlyqsyz dep qabyldady.
«Pandýstar - eń mańyzdy másele emes. Biz ony birinshi kezekte jasaýymyz kerek. Eń bastysy - ómir sapasyn jaqsartý, - dep qadap aıtty oblys ákimi. - Baıandama taza sheneýnik turǵysynan jasalǵan, meıirimsiz. Jaǵdaıdyń eshqandaı saraptamasyn estigen joqpyn. Bizde qandaı problemalardy sheshý kerektigi de aıtylmady. Ol jaıynda jınalysqa kelgen qonaqtarymyz ǵana aıtty. Qabyldamaımyn myna esepterińizdi».
Aımaq basshysy múgedekter qoǵamdyq qorlarynyń ókilderine ashyq áńgime úshin alǵys aıtty.
«Qazir mine, bizdiń kóshelerimizde múmkindigi shekteýli jandardy sırek kezdestirýge bolatyny týraly aıtyldy. Sebebi ol adamdarǵa úılerinen shyǵý qıyn. Biz barlyǵymyz shet elderde bolamyz, ol jerde basqa kórinis. Ol jaqtaǵy múgedekter eshqandaı tarshylyq kórmeıdi, qoǵamdyq ortada ózderin bos ustap, barlyq adamdarmen teń jaǵdaıda bolady. Bizge sondaı jaǵdaıǵa umtylý kerek, - dedi Erlan Qoshanov. - Biz osy jerde aıtylǵan árbir máselege naqty toqtalyp, júıeli jumys qurýymyz kerek. Ádette úılestirý keńesin meniń orynbasarym ótkizetin. Endi ár jınalysty men ózim ótkizemin. Atqarylyp jatqan jumystardy ózim baqylaıtyn bolamyn».
