Erlan Qoshanov Májilistiń sessııasyn qorytyndylady
ASTANA. KAZINFORM — Májilis tóraǵasy Erlan Qoshanov VIII saılanǵan QR Parlamentiniń úshinshi sessııasyndaǵy palatanyń jumysyn qorytyndylady.
- Búgin biz Májilistiń úshinshi sessııasynyń jumysyn aıaqtap otyrmyz. Parlamenttiń jalpy jumys qorytyndysy dúısenbi kúni, 30-shy maýsymda qos palatanyń birlesken otyrysynda jasalady. Al qazir Májilis qyzmetiniń keıbir nátıjelerine qysqasha toqtalyp óteıin. Osy sessııada 39 jalpy otyrys ótkizilip, 249 másele qaraldy jáne 90 zań qabyldandy, - dedi E. Qoshanov.
Osy oraıda ol depýtattar eń áýeli azamattardyń áleýmettik jaǵdaıyna erekshe mán bergenin aıtty.
Birinshiden, mindetti áleýmettik medıtsınalyq saqtandyrý júıesine qatysty tásilder qaıta qaraldy. Barlyq azamat úshin, tipti saqtandyrylmaǵan bolsa da, alǵash júgingen kezde tegin bazalyq medıtsınalyq kómektiń saqtalýy úlken jetistik boldy. Tegin medıtsınalyq kómektiń kepildik berilgen kólemine onkologııalyq skrınıngter engizildi. Sondaı-aq, qulaǵy nashar estıtin jandardy, ásirese balalardy jergilikti bıýdjet qarjysy esebinen estý apparatymen qamtamasyz etý múmkindigi qarastyryldy.
- Memleket basshysynyń bastamasymen biz «Keleshek» biryńǵaı erikti jınaqtaý júıesiniń zańnamalyq negizin qaladyq. Jańa jınaqtaý júıesiniń arqasynda balalardyń sapaly bilim alýyna qosymsha múmkindikter beriledi. Sonymen birge, halyqaralyq ǵylymı jarystarǵa qatysýshylardyń úzdikteri konkýrssyz, sonyń ishinde «Bolashaq» baǵdarlamasy aıasynda bilim granttaryn alatyn norma engizildi. Bul – bizdiń balalarymyz úshin memleket tarapynan úlken qoldaý, - dedi Májilis tóraǵasy.
Onyń aıtýynsha, depýtattardyń qyzmetindegi basty baǵyt «Zań men tártip» qaǵıdatyn zańnamalyq turǵydan odan ári iske asyrý boldy. Depýtattar elimizdiń qylmys jazasy kodeksterin ońtaılandyrý boıynsha úlken jumys atqardy. Azamattardy qylmystyq qastandyqtan qorǵaýǵa baǵyttalǵan zańdar qabyldandy. Jaǵymsyz áleýmettik qubylystarǵa jaýap retinde ınternet-alaıaqtyq jasaǵany úshin «dropperlerge» qatysty qylmystyq jaýapkershilik kúsheıtildi. Depýtattar nekege turýǵa májbúrleý isi úshin de jaza engizdi.
- Adamnyń bet-álpetin tanyp-bilýge kedergi keltiretin kıim kııýge tyıym salyndy. Jaýapkershilikti kúsheıtýmen qatar, depýtattar izgi sheshimder qabyldaý qajettigin de umytqan joq. Keıbir azamattardyń abaısyzdan, qıyn ómirlik jaǵdaıda júrip quqyqbuzýshylyqqa baratyny belgili. Sondyqtan biz esirtki taratýshylar men óndirýshiler arasyndaǵy qylmystyq jaýaptylyqtyń ara-jigin ajyrattyq. Bul Memleket basshysynyń Ulttyq quryltaıda bergen tapsyrmasy bolatyn. Qazirdiń ózinde alǵash ret súrinip, esirtki jasyrǵan jas azamattarǵa qatysty úsh myńnan astam is qaıta qaralyp, olardy bosatý men úkimdi jeńildetý baǵytynda jumys júrgizilip jatyr, - dedi ol.
Sonymen qatar E. Qoshanov Konstıtýtsııanyń 30 jyldyǵy qarsańynda depýtattar tarapynan Raqymshylyq jasaý týraly zań ázirlenip, qabyldanǵanyn eske saldy. Keshe ǵana Memleket basshysy ol qujatqa qol qoıyp, zań kúshine endi. Raqymshylyq jasaý arqyly 15 myń adamnyń jaza merzimi qysqartylady. Onyń 2 myńǵa jýyǵy bostandyqqa shyǵady.
- Sessııa barysynda depýtattyq saýal sekildi mańyzdy tetikter de belsendi túrde júzege asty. Memlekettik organdardyń laýazymdy qyzmetkerleri atyna 461 depýtattyq saýal joldanyp, azamattardy tolǵandyryp júrgen eń ózekti máseleler kóterildi. Kóptegen problema sol saýaldardyń nátıjesinde sheshimin taýyp jatyr... Áriptester, Parlament sessııasy aıaqtalyp qaldy. Endi sizder óńirlerdi aralap, saılaýshylarmen kezdesesizder. Bul bizge el-jurttyń saýaldary men usynystaryn óz aýzynan estýge, óńirlerdegi shynaıy jaǵdaıdy óz kózimizben kórýge múmkindik beredi, - dedi ol.
Aıta keteıik, búgin Parlament Májilisi jańa Salyq kodeksi men ilespe qujatqa Senattyń jańa redaktsııada usynǵan jekelegen baptarymen kelisti.