Erlan Qoshanov Májiliske daıyndyqsyz kelgen mınıstrlikter ókilderine eskertý jasady

ASTANA. QazAqparat – Májilis tóraǵasy Erlan Qoshanov palatanyń jalpy otyrysyna mınıstrlikterdiń ókilderi daıyndyqpen kelýin talap etti dep habarlaıdy QazAqparat.

Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn. Otyrys kezinde keıbir mınıstrlikterdiń ókilderi depýtattardyń saýalyna tolyq jaýap bere almady.

«Keıbir mınıstrlikterdiń ókilderine eskerý aıtqym keledi. Jalpy otyrysqa daıyndalyp kelý kerek. Qol astyndaǵy adamdardyń qoldaryńyzǵa jazyp bergen anyqtamasyn oqyp berý qajet emes. Osy suraqtardyń barlyǵy buǵan deıin jumys tobynda, komıtettiń otyrysynda talqylandy. Endi osy jalpy otyrysta qaralatyn taqyrypty egjeı-tegjeıli bilip turýlaryńyz kerek qoı. Úkimettiń ókiline de osy eskerpeni aıtamyn», - dedi E. Qoshanov.

Osy oraıda Májilis tóraǵasy bul eskertýdi Premer-Mınıstrge jetkizýdi tapsyrdy.

«Eger osynda daıyn emes mınıstrlikterdiń ókilderi bolsa, onda ornyna basqa adamdar kelsin», - dep eskertti Erlan Qoshanov.

Foto: www.parlam.kz