Erlan Qoshanov Májilis sessııasyn qorytyndylady
«Búgin Májilistiń birinshi sessııadaǵy qorytyndy jalpy otyrysyn ótkizip jatyrmyz. Prezıdent Qasym-Jomart Kemeluly Toqaev sessııanyń ashylýynda Májilistegi ár fraktsııaǵa birqatar mindet júktegen bolatyn. Fraktsııalar, bir mandatty okrýgten saılanǵan depýtattar osy mindetterdi oryndaýǵa atsalysyp kele jatyr. Bolashaqta da jumys qarqyndy jalǵasady dep oılaımyn. Bul sessııa qysqa bolǵanymen, óte mańyzdy ári mazmundy ótti dep aıta alamyz. Osy jolǵy saılanymnyń bir ereksheligi – depýtattar kóptegen mańyzdy zań jobasyna bastamashy boldy. Tutastaı alǵanda, bul sessııada 31 zań qabyldadyq, olardyń úshten birine depýtattar bastamashy boldy», - dedi E. Qoshanov Májilistiń jalpy otyrysynda.
Onyń aıtýynsha, depýtattar azamattardyń saılaý naýqany kezinde aıtylǵan barlyq talap-tilegin eskerdi.
«Májilistiń ókilettigi kúsheıtilgenin bilesizder. Sonyń aıasynda alǵash ret Joǵary aýdıtorlyq palatanyń esebin tyńdadyq. Depýtattardyń belsendigin kórsetetin taǵy bir másele – ol depýtattyq saýaldar. Osy sessııada ár jalpy otyrysta orta eseppen 30-ǵa deıin depýtattyq saýal jarııalanyp otyrdy. Onyń árqaısysynda eldegi túıtkildi máseleler, sonyń arasynda ár adam men otbasynyń turmys-tirshiligin jaqsartýǵa baǵyttalǵan mańyzdy máseleler kóterildi. Ár máseleniń sheshilýi bizdiń erekshe nazarymyzda bolady», - dedi Májilis tóraǵasy.
Sonymen qatar ol Memleket basshysynyń jalpy otyrystardy elimizdiń basty telearnalarynda tikeleı efırde kórsetý týraly bastamasy jurtshylyq jaǵynan jaqsy qabyldanyp jatqanyn aıtty.
«Barlyq deńgeıdegi otyrystar, talqylaýlar BAQ ókilderi men sarapshylardyń qatysýymen barynsha ashyq uıymdastyrylyp jatyr. Osy sessııada qoǵamdyq palatanyń jumysy da belsendi bastaldy. Sóıtip, halyqty tolǵandyrǵan zań jobalary palata otyrystarynda qoǵamdyq saraptamadan ótip jatyr», - dedi Erlan Qoshanov.
«Osy sessııa aıaqtalyp qaldy. Alda óńirlerge saparlar, halyqpen kezdesýler kútip tur. Barlyq óńirde, shalǵaıdaǵy aýyldar men eldi mekenderde kezdesý ótkizýge tıispiz. Basty maqsatymyz – eldiń ortasynda bolyp, túıtkilderdi sheshýge kómektesý, óńirlermen baılanysty nyǵaıtý. Jazda atqarylǵan jumys kelesi sessııaǵa oń áserin tıgizedi dep sanaımyn», - dedi palata tóraǵasy.
Eske salsaq, bıyl 29 naýryzda VIII saılanǵan QR Parlamentiniń birinshi sessııasy ashyldy.
