Erlan Qoshanov Máskeý dýmasynyń basshysyn qabyldady
ASTANA. KAZINFORM - Májilis tóraǵasy Erlan Qoshanov Máskeý qalalyq dýmasynyń tóraǵasy Alekseı Shaposhnıkovpen jergilikti ókildi organdar arasyndaǵy yntymaqtastyqty nyǵaıtý máselesin talqylady. Bul týraly Májilistiń baspasóz qyzmeti habarlady.
Májilis spıkeri Máskeý qalalyq dýmasynyń delegatsııasymen kezdesýde eki el arasynda barlyq deńgeıde ózara tyǵyz baılanys ornaǵanyn atap ótti.
– Sizdiń elordaǵa saparyńyz eki astananyń ókildi organdary arasyndaǵy yntymaqtastyqty jańa deńgeıge kóteredi. Bul óte mańyzdy, óıtkeni Astana men Máskeý depýtattary óz óńirleriniń máselelerin jaqsy biledi jáne eki elorda arasyndaǵy baılanystardyń mazmunyn tolyqtyra alady, – dedi Erlan Qoshanov.
Májilis tóraǵasy Reseı Federatsııasynyń Prezıdenti Vladımır Pýtınniń Qazaqstanǵa jaqynda jasaǵan memlekettik saparynyń tarıhı mańyzdylyǵyna nazar aýdaryp, Qazaqstan men Reseı basshylarynyń tatý kórshilik qatynastardy nyǵaıtýdaǵy erekshe róline jeke toqtaldy.
Sapar qorytyndysy boıynsha jańa jahandyq tártip jaǵdaıynda strategııalyq seriktestikti tereńdetý týraly birlesken málimdeme qabyldandy. Onda parlamentaralyq yntymaqtastyqtyń joǵary qarqyny atap ótilgen.
– Bul – eki el parlamentteriniń qarym-qatynasyna berilgen óte joǵary baǵa. Bizdiń parlamentshiler bir-birimen jeke de, jumys boıynsha da tikeleı baılanysta bolyp, týyndaǵan máselelerdi jedel sheshýde. Osy jazda Memlekettik Dýmamen yntymaqtastyq jónindegi parlamentaralyq komıssııanyń jumysy qaıta jandandy, – dedi Májilis spıkeri.
Alekseı Shaposhnıkov qonaqjaılyq úshin alǵysyn bildirip, Astana máslıhaty men Máskeý qalalyq dýmasy arasyndaǵy ózara yqpaldastyqty odan ári damytýdy usyndy. Taraptar sondaı-aq mádenı, bilim berý jáne ekonomıka salalardaǵy yntymaqtastyq jónindegi birqatar máseleni talqylady.
Eske salsaq, Qazaqstan Respýblıkasynyń Prezıdenti Qasym-Jomart Toqaevtyń «Izvestııa» gazetine Qazaqstan men Reseı arasyndaǵy baılanys týraly kólemdi maqalasy shyqty.