Erlan Qoshanov konferentsııaǵa qatysýshylarǵa Prezıdenttiń quttyqtaýyn oqyp berdi
ASTANA. KAZINFORM – Májilis tóraǵasy Erlan Qoshanov L.N.Gýmılev atyndaǵy Eýrazııa ulttyq ýnıversıtetinde «Berdibek Saparbaev tulǵasy» atty respýblıkalyq ǵylymı-praktıkalyq konferentsııaǵa qatysty. Onda B.Saparbaevtyń jaqyndary, qyzmettes serikteri men shákirtteri, Úkimet músheleri men Parlament depýtattary bas qosty.
Aldymen Erlan Qoshanov Memleket basshysy Qasym-Jomart Toqaevtyń konferentsııaǵa qatysýshylarǵa arnalǵan quttyqtaýyn oqyp berdi.
– Berdibek Máshbekuly – Táýelsiz Qazaqstannyń qalyptasýyna jáne damýyna ólsheýsiz úles qosqan kórnekti memleket jáne qoǵam qaıratkeri. Ol ár jyldary joǵary laýazymdy qyzmetterdi abyroımen atqaryp, elimizdiń ósip-órkendeýine zor eńbek sińirdi. Birqatar óńirge jáne memlekettik organdarǵa jetekshilik etip, parasatty, isker ári bilikti basshy retinde tanyldy. Halyqtyń erekshe syı-qurmetine bólendi. Qaıratker tulǵanyń adamı qasıetteri, kásibı biliktiligi jáne adal qyzmeti – jas memlekettik qyzmetshilerge árdaıym úlgi-ónege, - delingen Prezıdent hatynda.
Jıynda Premer-Mınıstrdiń orynbasary Tamara Dúısenova, Parlament Senaty tóraǵasynyń orynbasary Jaqyp Asanov, Prezıdenttiń ǵylym jáne ınnovatsııalar máseleleri jónindegi keńesshisi Kúnsulý Zakarıa, Shyǵys Qazaqstan oblysynyń ákimi Ermek Kósherbaev, Qazaqstannyń Eńbek Eri Quralaı Baımenova jáne basqa da memleket, qoǵam qaıratkerleri sóz sóılep, Berdibek Máshbekuly týraly júrekjardy estelikterimen bólisti.
Konferentsııada memleket jáne qoǵam qaıratkeri jaıly kitaptyń tusaýy kesilip, taǵylymdy ómir joly týraly arnaıy túsirilgen fılm kórsetildi.
