Erlan Qoshanov kómir máselesin kún saıyn baqylaýdy tapsyrdy
QARAǴANDY. QazAqparat - Qysqa daıyndyq ýaqytynda kómir máselesi bılik basyndaǵylardyń erekshe nazarynda. Qaraǵandy oblysynyń ákimi Erlan Qoshanov jaǵdaıdy únemi baqylaýda ustaýdy tapsyrdy, dep habarlaıdy QazAqparat Qaraǵandy oblysy ákimdiginiń baspasóz qyzmetine silteme jasap.
Aımaq basshysy Qaraǵandydaǵy eń iri kómir qoımalarynyń birine baryp, kómir qorynyń kólemin jáne qatty otyndy tasymaldaý jumystaryn baqylap shyqqan bolatyn.
«Jalyndy Otan» JShS kómir qoımasynda tutynýshylar arasynda anaǵurlym suranysqa ıe Shubarkól kómiri, sondaı-aq Kýznetskıı jáne Ekibastuzdyń qatty otyny satylady.
Kásiporyn málimetinshe, osy kúnderi satý joǵarylaǵan. Kún saıyn 200-ge deıin kólikke tıeledi. Kómirge qatysty qıyndyqtar joq.
«Jaǵdaı bir qalypty, dúrligý joq. Tolyq rejımde jumys istep jatyrmyz: tıeýdi tańerteńgi 8.00-den bastap, sońǵy klıentke deıin jumys isteımiz. Qazirgi tańda qoımada shamamen 9000 tonna kómir bar», - dedi ýchaske bastyǵy Dmıtrıı Býkın.
aıta keterligi, byltyr osy ýaqytta adamdardyń suranysy báseń bolǵan. Al bıyl jergilikti atqarýshy bıliktiń júrgizgen jumysynyń arqasynda maýsym eki aı buryn bastaldy. Demek, adamdar qysqy qor týraly erterek oılanyp, kómir ala bastady.
Kásiporyndy aralaǵannan soń ákim qyzmetkerlerge kómir máselesin kún saıyn baqylaýdy tapsyrdy.
«Kún saıyn osy jerde bolasyzdar. Halyqpen de jumysty jalǵastyra berińizder», - dep talap etti Erlan Qoshanov Qaraǵandy qalasynyń ákiminen.
Buǵan deıin habarlanǵandaı, ortalyqtandyrylǵan jylytý júıesine qosylmaǵan turǵyn úılerge qysqy maýsymda shamamen 745 myń tonna kómir qajet. Aımaqta bes negizgi kómir jetkizýshi kompanııa jumys atqarady. Turǵyndarǵa 38 orynda kómir satylady.
2018 jyldyń 8 aıynda oblysta kommýnaldyq-turmystyq qajettilikterge úshin 14 mln tonna kómir óndirilgen. Bul ótken jylǵy osyndaı merzimmen salystyrǵanda 10%-ǵa kóbirek. Al jyl boıyna 38 mln tonna kómir óndirý josparlanyp otyr, bul 2017-shi jylmen salystyrǵanda 19%-ǵa kóbirek.
