Erlan Qoshanov: Qoǵamdyq palata jańa saıası júıede laıyqty oryn ıelendi
ASTANA.KAZINFORM — Májilis janyndaǵy Qoǵamdyq palatanyń jumysy aıaqtaldy. Qorytyndy otyrysta Májilis tóraǵasy Erlan Qoshanov palata múshelerine zań shyǵarý qyzmetine belsene aralasyp, jemisti jumys atqarǵany úshin alǵysyn bildirdi, olardyń basty jetistikterin atap ótti.
Erlan Qoshanov Qoǵamdyq palata aýqymdy saıası ózgerister bastaý alyp, azamattyq qoǵamnyń róli kúsheıgen kezeńde qurylǵanyna toqtaldy.
– Sol tusta Memleket basshysy kóshelermen alańdardaǵy pikirtalas Parlament qabyrǵasyna ótýi kerek degen bolatyn. Májilis janynda Qoǵamdyq palatanyń qurylýy osyǵan jaýap boldy. Búgingi tańda atqarylǵan jumys mazmundy, qoǵam suranysyna saı ári nátıjeli boldy dep senimmen aıta alamyz. Qoǵamdyq palata elimizdiń jańa saıası júıesindelaıyqty oryndy ıelendi, – dedi Májilis tóraǵasy.
Spıker Qoǵamdyq palata elimizdiń damýyndaǵy ózekti máseleler boıynsha syndarly pikir aıtylatyn ashyq alańǵa aınalǵanyna nazar aýdardy. Bul rette, palata músheleri tek baqylaýshy ǵana emes, zań shyǵarý protsesiniń tolyqqandy qatysýshysy bolǵanyn aıtty. Olar zań jobalaryna qatysty júzdegen tujyrymdamalyq usynys joldap, sonyń birazy jumysqa qabyldandy.
Sonymen qatar Qoǵamdyq palata músheleri qoǵamdaǵy eń kúrdeli ári ózekti taqyryptardy talqylaýǵa belsendi atsalysyp, memleket pen azamattardyń arasynda ashyq dıalogty qamtamasyz etti. Almaty turǵyndarymen Múlik ıeleriniń birlestigi jáne Páter ıeleri kooperatıvteriniń problemalary boıynsha kezdesýler ótkizdi, Býrabaıda turmystyq zorlyq-zombylyqqa qarsy kúres jónindegi zańnamanyń oryndalý máselelerin talqylady, Nazarbaev Ýnıversıtetiniń Medıtsına mektebiniń alańynda mindetti áleýmettik medıtsınalyq saqtandyrýdyń problemalaryn kóterdi.
Májilis spıkeri atap ótkendeı, Qoǵamdyq palata otyrystarynda jeńil taqyryp bolǵan joq. Olardyń qatarynda zańsyz shyǵarylǵan aktıvterdi qaıtarý týraly zań, jańa Salyq kodeksiniń normalary, mass-medıa týraly zań bar. Budan bólek, Qurylys pen Tsıfrlyq kodekster, jasandy ıntellekt týraly zań, jergilikti ózin-ózi basqarý, lýdomanııa, esirtki qoldaný men taratý jáne basqa máseleler keńinen talqylandy.
Erlan Qoshanov Qoǵamdyq palatanyń ár múshesine tabandylyǵy men prıntsıptiligi, joǵary belsendiligi men úlken jaýapkershiligi úshin rızashylyǵyn bildirdi. Depýtattarmen birge zań shyǵarý qyzmetinde de olardyń eleýli ári mańyzdy iz qaldyrǵanyna mán berdi.
Májilis tóraǵasy bıyl 1 shildeden bastap jańa Konstıtýtsııa kúshine enetinin eske saldy. Onyń normalaryna sáıkes, kúzde Qazaqstan Respýblıkasynyń bir palataly Quryltaıy qurylady. Spıker Qoǵamdyq palatanyń mol tájirıbesi men dástúrleri Quryltaı jumysynda da jalǵasyn tabatynyna senim bildirdi.
Qoǵamdyq palatanyń tóraǵasy, Májilis depýtaty Aıdos Sarym segizinshi saılanym barysynda palatanyń 30 otyrysy, sonyń ishinde 10 kóshpeli otyrys ótkenin aıtty. Osy jıyndardyń qorytyndysy boıynsha Májilistiń salalyq komıtetteri men ýákiletti memlekettik organdarǵa 500-den astam usynym joldandy.
Ol Qoǵamdyq palata músheleri Parlamenttik reforma jónindegi jumys tobyna, Konstıtýtsııalyq komıssııaǵa jáne «Ádiletti jáne Progressıvti Qazaqstannyń Halyqtyq Konstıtýtsııasy úshin!» jalpyulttyq koalıtsııasynyń aqparattyq jumysyna belsendi qatysqanyna toqtaldy.
«Qazaqstandaǵy parlamentarızmdi damytý qory» qoǵamdyq qorynyń prezıdenti Záýresh Battalova Qoǵamdyq palatanyń qurylýy sońǵy jyldardaǵy eń mańyzdy ınstıtýtsıonaldyq sheshimderdiń biri bolǵanyn atap ótti. Onyń pikirinshe, salystyrmaly túrde az ýaqyt ishinde Qoǵamdyq palata Parlamenttiń, azamattyq qoǵamnyń, sarapshylar qoǵamdastyǵynyń, bıznes pen kásibı birlestikterdiń birlesken is-áreketiniń mańyzdy alańyna aınaldy. Bul rette Záýresh Battalova ınstıtýtsıonaldyq jadyny saqtap, jınaqtalǵan nátıjelerdi sarapshylar qaýymynyń kelesi quramyna berýdiń mańyzdy ekenin aıtty.
Eýrazııalyq tutynýshylar odaǵynyń basqarma basshysy, Qoǵamdyq palata tóraǵasynyń orynbasary Svetlana Romanovskaıa jasandy ıntellekt tehnologııalaryn paıdalanyp kommertsııalyq emes uıymdardyń tájirıbe almasýy úshin biryńǵaı alań qurý týraly usynys bildirdi. Al saıasattanýshy Danııar Áshimbaev Májilis janyndaǵy Qoǵamdyq palata sııaqty alań Parlamentke ǵana emes, sarapshylardyń ózderine de qajet ekenine toqtaldy. Ol sondaı-aq Májilistiń ótken segizinshi saılanymy pikir alýandyǵy men erekshelenetinin atap ótti.
Otyrys qorytyndysy boıynsha Májilis tóraǵasy Qoǵamdyq Palata múshelerine alǵys hattar tabys etti.
