Erlan Qoshanov Qytaı Parlamentiniń basshysymen kezdesti
ASTANA. KAZINFORM – Májilis tóraǵasy Erlan Qoshanov Qazaqstanǵa resmı saparmen kelgen Qytaı Halyq Respýblıkasy Búkilqytaılyq halyq ókilderi jınalysy Turaqty komıtetiniń tóraǵasy Chjao Letszımen kezdesti. Májilis spıkeri Shansı ólkesindegi kómir shahtasynda bolǵan gaz jarylysy saldarynan kóptegen adamnyń qaza bolýyna baılanysty qytaılyq áriptesine jáne barsha Qytaı halqyna kóńil aıtty, jaraqat alǵandardyń tezirek saýyǵyp ketýine tilektestigin bildirdi.
Chjao Letszı Astanaǵa Májilis spıkeriniń shaqyrýymen keldi. Mártebeli meımandy qarsy alǵan Erlan Qoshanov bul sapardyń tarıhı mańyzdylyǵyn atap ótip, Qytaı Qazaqstannyń tatý kórshisi ári senimdi seriktesi ekenine toqtaldy.
– Búginde Qytaı Halyq Respýblıkasy qarqyndy damyp keledi. Ol – álemdegi ekonomıkasy eń iri jáne ozyq eldiń biri, halyqaralyq saıasattyń negizgi qatysýshysy. Biz úshin Qytaımen máńgilik jan-jaqty strategııalyq seriktestikti damytý óte mańyzdy. Ekijaqty qatynasymyz jańa «altyn 30 jyldyqqa» qadam basty. Bul – Qazaqstan men Qytaı kóshbasshylarynyń jeke úlesiniń, olardyń berik dostyǵynyń, turaqty kezdesýleriniń nátıjesi. Ótken jyly bizdiń memleketterimizdiń basshylary eki ret kezdesti. Osy dıalogtardyń árqaısysy qazaq-qytaı qarym-qatynasynyń damýyna qýatty serpin berdi, – dedi Májilis spıkeri.
Erlan Qoshanov Qazaqstan men Qytaı parlamentteri eki el kóshbasshylary aıqyndap bergen baǵdar boıynsha senimdi seriktestikti odan ári damytý úshin bar kúsh-jigerin salyp jatqanyn atap ótti. Aýqymdy yntymaqtastyq pen zań shyǵarý salasynda tájirıbe almasý barlyq deńgeıde jolǵa qoıylyp, Qazaqstan-Qytaı dostyq toptary belsendi jumys atqaryp jatyr.
Májilis tóraǵasy qytaılyq áriptesine elimizde Prezıdent Qasym-Jomart Toqaevtyń bastamasymen Ádiletti jáne Progressıvti Qazaqstan qurý jolynda kezeń-kezeńimen iske asyp jatqan aýqymdy reformalar týraly aıtyp berdi. Respýblıkalyq referendýmda azamattardyń basym kópshiligi qoldaǵan jańa halyq Konstıtýtsııasynyń qabyldanýyna erekshe nazar aýdaryldy. «Adam memleket úshin emes, memleket adam úshin» qaǵıdaty onyń ózegine aınaldy. Sonymen qatar jańa Ata zań bir palataly Parlamentke – Quryltaıǵa kóshýdi, sondaı-aq Vıtse-Prezıdent pen Halyq Keńesi sııaqty jańa ınstıtýttardyń qurylýyn bekitti.
Ekijaqty yqpaldastyq týraly aıta kele, Májilis spıkeri elder arasyndaǵy partııaaralyq yntymaqtastyq qarqyndy damyp jatqanyn atap ótti. Bul da strategııalyq áriptestikti nyǵaıtýǵa septigin tıgizedi. Áńgime barysynda ol Búkilqytaılyq halyq ókilderi jınalysynyń depýtattaryn Qytaı Kommýnıstik partııasyna 105 jyl tolýymen quttyqtady.
Erlan Qoshanov zań shyǵarý jumysyna toqtalyp, 2026 jyl Qazaqstanda Tsıfrlandyrý jáne jasandy ıntellekt jyly bolyp jarııalanǵanyna mán berdi. Memleket basshysynyń aldaǵy úsh jylda elimizdi tsıfrlyq memleketke aınaldyrý jónindegi strategııalyq maqsatyn iske asyrý úshin Parlament depýtattary jasandy ıntellekt týraly zań men Tsıfrlyq kodeksti ázirlep, qabyldady. Bul rette Qazaqstan depýtattary álemdegi eń iri tsıfrlyq derjavanyń biri sanalatyn Qytaımen osy baǵyttar boıynsha tájirıbe almasýǵa qyzyǵýshylyq tanytyp otyr.
Qytaı Halyq Respýblıkasy Búkilqytaılyq halyq ókilderi jınalysy Turaqty komıtetiniń tóraǵasy Chjao Letszı qazaqstandyqtardy referendýmnyń jemisti ótýimen jáne jańa Konstıtýtsııanyń qabyldanýymen quttyqtap, Prezıdent Qasym-Jomart Toqaevtyń basshylyǵymen Ádiletti Qazaqstan qurý maqsatyna qol jetkiziletinine senim bildirdi. Sondaı-aq ol qazaqstandyq áriptesterine aldaǵy bir palataly Quryltaı saılaýynda tabys tiledi.
Chjao Letszı Qytaı tarapy dástúrli dostyq pen joǵary deńgeıdegi ózara senimdi Qytaı men Qazaqstan halyqtarynyń ıgiligi jolyndaǵy yntymaqtastyqtyń naqty nátıjelerine aınaldyrýǵa baǵyttalǵan eki el basshylarynyń mańyzdy kelisimderin iske asyrý úshin bar kúsh-jigerin salýǵa daıyn ekenin aıtty.
Taraptar sondaı-aq ınvestıtsııa, energetıka, saýda, logıstıka jáne mádenı-gýmanıtarlyq salalardaǵy yntymaqtastyqty zańnamalyq turǵyda qoldaýǵa qatysty kóptegen máseleni talqylady.
Qytaı Halyq Respýblıkasy Búkilqytaılyq halyq ókilderi jınalysy Turaqty komıteti tóraǵasynyń resmı sapary aıasynda Senat spıkerimen kezdesý, Astanadaǵy birqatar iskerlik jáne mádenı nysandarǵa barý josparlanǵan.
